Prezident Administrasiyasının sabiq şöbə müdiri Əli Həsənov bu gün mediada gedən xəbərə münasibət bildirib.
Medialive.az xəbər verir ki, keçmiş şöbə müdiri KONKRET.az-a açıqlamasında deyib ki, onun torpağın satışından 12 milyon manat əldə etməsi ilə bağlı informasiya tam yalandır:
“Mənim ailəm Təchizatcıdakı səhmlərini bir neçə ilə əvvəl satıb. İndi o müəssisənin mənə və ailəmə heç bir aidiyyatı yoxdur!”.
Xatırladaq ki, “Axar.az” saytında Əli Həsənovun Binəqədi rayonu ərazisində yerləşən torpağın satışından 12 milyon manat əldə etdiyi haqda məlumat dərc olunub.
Bildirilib ki, “Təchizatçı” ASC-nin adına olan torpaq sahəsi Bakı şəhəri, Binəqədi rayonu, 7-ci mikrorayon, 3097-ci məhəllə, 14B ünvanında yerləşir. Torpaq sahəsinin təxminən 1.7 hektara yaxın olduğu göstərilib.
O da qeyd olunub ki, ərazi ilə bağlı Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidməti tərəfindən verilən çıxarışda torpaq sahəsi əmlak kompleksi müəssisəsi kimi göstərilib.
