Rusiyalı televiziya aparıcısı Vladimir Solovyova qarşı sui-qəsd cəhdində ittiham olunan şəxslərin onu zəhərlənmiş pizza vasitəsilə öldürməyi planlaşdırdıqları məlum olub.
Medialive.az xəbər verir ki,bu barədə məlumat Moskvadakı İkinci Qərb Dairəsi Hərbi Məhkəməsində keçirilən proses zamanı açıqlanıb.
Məhkəmə iclasında təqsirləndirilənlərdən biri — Andrey Pronskinin mənzilində qeydə alınmış səs yazısı dinlənilib. Yazıda o, həmkarları Vladimir Belyakov və digər şəxslərlə planı müzakirə edərək deyir:
“Məsələn, biz Solovyovun ünvanını tapırıq, Yandex Food vasitəsilə sifarişini izləyirik, sifarişi ələ keçiririk və ona zəhərlənmiş pizza veririk.”
Söhbət zamanı daha bir variant da təklif olunub — Solovyovun avtomobilinin sükanına və salonuna zəhərli maddələr sürtülməsi. Lakin təqsirləndirilənlər bu üsulun etibarsız olduğunu deyərək ondan imtina ediblər. Nəticədə onlar teleaparıcının avtomobilini evdə hazırlanmış partlayıcı qurğu ilə partlatmaq barədə qərara gəliblər.
