Britaniya “Brexit”in iqtisadiyyata mənfi təsiri səbəbindən Avropa İttifaqı ilə əlaqələri gücləndirməyə başlayacaq.
Medialive xəbər verir ki, bu barədə baş nazir Keir Starmer Londonda ölkənin iqtisadi vəziyyəti ilə bağlı çıxışı zamanı bildirib.
“Biz reallığı qəbul etməliyik. Əldə etdiyimiz Brexit sazişi iqtisadiyyatımıza ciddi ziyan vurdu. Ona görə də iqtisadi dirçəlişə nail olmaq üçün biz sürtünmələri azaltmalı və Aİ ilə daha sıx əlaqələrə doğru getməliyik. Biz yetkinlik nümayiş etdirməli və bunun qarşılıqlı güzəştlər tələb edəcəyini qəbul etməliyik”, – baş nazir Sky News tərəfindən yayımlanan çıxışında deyib.
Qeyd edək ki, Britaniyanın Aİ-dən çıxması ilə bağlı referendum 2016-cı il iyunun 23-də keçirilib.
Britaniyalıların 51,9%-i Aİ-dən çıxmağın lehinə, 48,1%-i isə əleyhinə səs verib. Bir neçə il davam edən danışıqlardan sonra Böyük Britaniya 2020-ci il fevralın 1-nə keçən gecə Aİ-ni tərk edib.
1 yanvar 2021-ci ildə bütün Avropa qaydalarının Böyük Britaniyaya tətbiq olunduğu Brexit-dən sonrakı keçid dövrü başa çatıb.
