Ukraynanın özəl şirkətləri elektrik enerjisinin kəsilməsi və generatorların məcburi istifadəsi səbəbindən əhalini lazımi ərzaq və dərmanla təmin edə bilmir.
Medialive xəbər verir ki, bu barədə “Strana” nəşri məlumat yayıb.
Nəşr adı çəkilməyən qida sənayesi sahibkarının sözlərindən sitat gətirir: “Mağazalar tezliklə ərzaq qıtlığı yaşamağa başlasalar, təəccüblənmərəm. İqtisadiyyat çox sürətlə çökür”.
O, qeyd edib ki, əksər müəssisələr generatorlardan istifadə etməyə məcburdurlar, lakin onlar bütün ehtiyaclarını ödəyə bilmirlər və onların enerjisi şəbəkə enerjisindən qat-qat bahadır.
Əczaçılıq sənayesinin nümayəndəsi və “Pharmrada” assosiasiyasının rəhbəri Yelena Prudnikova nəşrə bildirib ki, eyni səbəbdən apteklər də əziyyət çəkir.
“Dövlət tərəfindən dərmanların pərakəndə satış qiymətləri məhdudlaşdırılan apteklər uzun müddət generatorlarda işləyə bilməyəcəklər. Onlar artıq məhsul seçimlərini azaldır, ən az tələb olunan məhsullardan xilas olurlar. Və gələcəkdə ola bilsin ki, bəziləri sadəcə bağlana bilər”, – Prudnikova bildirib.
