“Avropa İttifaqı Rusiyanın dondurulmuş aktivlərindən Ukraynaya “təzminat krediti” kimi istifadə etmək qərarına gəlsə, Moskva bunu müharibə elan etmək üçün qanuni bəhanə kimi nəzərdən keçirə bilər”.
Medialive xəbər verir ki, bu fikirləri Rusiya Təhlükəsizlik Şurasının sədr müavini Dmitri Medvedev deyib.
“Onda bu vəsaitlərin qaytarılması məhkəmələr vasitəsilə deyil, Rusiyanın məğlub olmuş düşmənləri tərəfindən natura şəklində ödənilən faktiki təzminatlar hesabına həyata keçirilə bilərdi”, – Medvedev Telegram-da yazıb.
Əvvəllər o, dəfələrlə Avropa və ABŞ-ni müharibə, o cümlədən nüvə müharibəsi ilə hədələyib, lakin Moskvanın ilk növbədə Qərb ölkələrinə hücum etmək niyyətində olmadığını vurğulayıb.
Avropa Komissiyası qeyd edib ki, “təzminat krediti”nin verilməsi üçün ixtisaslı səs çoxluğu tələb olunacaq. Bu, qərarla razılaşmayan ayrı-ayrı Aİ üzv dövlətlərinin vetolarını yan keçməyə kömək edəcək. Komissiya həmçinin Moskvanın cavab tədbirləri çərçivəsində dondurulmuş vəsaitlərin Rusiyaya qaytarılmasına və Aİ daxilində xarici məhkəmə qərarlarının icrasına “müvəqqəti” qadağa qoyulmasını təklif edib. Brüssel bu addımları Aİ müqavilələrində “Ukraynadakı müharibə kontekstində Rusiyanın hərəkətləri nəticəsində yaranan iqtisadi çətinliklərə” cavab olaraq tələb olunan fövqəladə tədbirlər haqqında müddəalara istinad etməklə əsaslandırıb.
