Aİ ölkələri dekabrın 18-19-u tarixlərində keçiriləcək sammitdən əvvəl Ukraynanın maliyyələşdirilməsi ilə bağlı hələ də vahid qərara gələ bilməyiblər. Bəzi ölkələr dondurulmuş Rusiya aktivlərinin istifadəsinə çağırır, digərləri isə Aİ-nin birgə borclanmasına üstünlük verir.
Medialive xəbər verir ki, bu barədə “Politico” məlumat yayıb.
Belə ki, Almaniyanın rəhbərlik etdiyi, Şimali və Şərqi Avropanın dəstəklədiyi bir qrup ölkə Ukraynaya dondurulmuş aktivlərlə təmin edilmiş təzminat krediti verməkdə israr edir. Onlar hesab edirlər ki, bu mexanizmə alternativ yoxdur.
Belçika, İtaliya, Bolqarıstan, Malta, Macarıstan və Slovakiya onlara qarşı çıxır. Onlar ortaq büdcə ilə təmin edilmiş ortaq Aİ borcunun verilməsi alternativini müdafiə edirlər.
Avropa Komissiyasının prezidenti Ursula fon der Leyen bildirib ki, ölkələr iki yol arasında seçim etməlidirlər: aktivlərdən istifadə və ya birgə borclanma.
Mümkün kompromis variantı, Ukraynaya yardım etməyə qarşı çıxan Macarıstan və Slovakiya istisna olmaqla, 27 Avropa ölkəsindən yalnız 25-nin maliyyələşdirmədə iştirak edəcəyi sxemdir.
Macarıstanın Baş naziri Viktor Orban aktiv məsələsinin sammitdə müzakirə olunmayacağını və danışıqların birgə kreditlər mövzusuna keçdiyini bildirib.
Lakin etibarlı yüksək vəzifəli Aİ rəsmisi bunu təkzib edərək Rusiya ehtiyatları variantının gündəmdə qaldığını təsdiqləyib.
