ABŞ Prezidenti Donald Tramp Floridadakı Mar-a-Laqo malikanəsində jurnalistlərə açıqlamasında ABŞ Hərbi Dəniz Qüvvələrinin imkanlarının dünya üzrə rəqiblərindən ən azı 15 il irəlidə olduğunu bildirib.
Medialive xəbər verir ki, onun sözlərinə görə, ABŞ hazırda üç yeni təyyarədaşıyan gəmi və 12–15 yeni sualtı qayıq inşa etməyi planlaşdırır.
Tramp ABŞ-nin indiyədək tikilmiş ən böyük və güclü döyüş gəmilərinin inşasına başlanıldığını açıqlayıb.
Bu gəmilərin yeni “Tramp sinfi” adlandırılacağı, əsas gəminin isə USS Defiant olacağı açıqlanıb.
Ümumilikdə 10-dan çox belə döyüş gəmisinin tikintisi nəzərdə tutulub.
Yeni döyüş gəmiləri hipersəs və nüvə raketləri, lazer silahları, elektromaqnit rels topu, inkişaf etmiş radar və elektron müharibə sistemləri ilə təchiz ediləcək. Layihənin dəyərinin yüksək olacağı, hər bir gəminin təxminən 5 milyard dollara başa gələ biləcəyi qeyd olunur.
Eyni zamanda ABŞ Hərbi Dəniz Qüvvələri “Qızıl Donanma” proqramı çərçivəsində FF(X) adlı yeni freqat sinfinin hazırlanmasını da elan edib. Bu gəmilər sürətli istehsal və daha az texniki dəyişiklik prinsipi əsasında ABŞ gəmiqayırma zavodlarında inşa ediləcək.
