Son günlər Azərbaycan Avtomobil Yolları Dövlət Agentliyi (AAYDA) ətrafında baş verən hadisələrin fonunda qurumla bağlı narazılıqlar səngimək bilmir.
Qaynar xəttimizə daxil olan müraciətlərdən birində AAYDA əməkdaşlarının səhər saat 08:30 radələrində Atatürk prospekti ilə Fətəli Xan Xoyski prospektini birləşdirən yeraltı keçidin divarlarının yuyulmasını əks etdirən görüntülər yer alıb.
Bildirilib ki, işlərin aparılması zamanı yolun hərəkət istiqaməti üzrə zolaqlardan biri bağlanıb. Bu isə pik saatda nəqliyyatın hərəkətinə ciddi təsir göstərərək ərazidə tıxacın yaranmasına səbəb olub.
Adətən gecə saatlarında (təxminən 00:00–06:00 aralığında) həyata keçirilən bu cür texniki və təmizlik işlərinin məhz səhər saatlarına salınması sual doğurur: Görəsən, niyə nəqliyyatın ən intensiv olduğu vaxt seçilib? Alternativ vaxt imkanı yox idimi?
Vətəndaşların rahat və təhlükəsiz hərəkətinin təmin olunması prioritet olmalı olduğu halda, belə addımlar ictimai maraqların nə dərəcədə nəzərə alındığı ilə bağlı ciddi suallar yaradır.
AAYDA üçün prioritet nədir – vətəndaşa xidmət, yol infrastrukturunun planlı və düzgün idarə edilməsi, yoxsa nəticədə süni tıxac effekti yaradan qərarlar?
Məsələ ilə bağlı qurumun mövqeyini dərc etməyə hazırıq.
Sözügedən kadrları təqdim edirik:
