Türkiyənin Qəzzada atəşkəs razılaşmasının təminatçılarından biri kimi regionda beynəlxalq sabitlik qüvvələrinin tərkibində iştirakla bağlı digər ölkələrlə məsləhətləşmələri davam etdirir.
Medialive xəbər verir ki, bu barədə “TRT Haber” telekanalı Müdafiə Nazirliyindəki mənbələrə istinadən məlumat yayıb.
Mənbələr əlavə ediblər ki, bu qüvvələrə təhlükəsizliyin təmin edilməsi, patrul xidməti, mülki infrastrukturun mühafizəsi, humanitar yardımın göstərilməsi, sərhəd təhlükəsizliyinin təmin edilməsi, atəşkəs rejiminə riayət olunmasına nəzarət vəzifəsi qoyulacaq.
Nüfuzlu “Hürriyet” qəzeti isə yazıb ki, İsrail türk hərbçilərinin beynəlxalq sabitləşdirmə qüvvələrində iştirakına qarşıdır.
Qeyd edək ki, sentyabrın 29-da Ağ Ev ABŞ Prezidenti Donald Trampın Qəzza münaqişəsinin həlli ilə bağlı planını açıqlayıb. 20 bənddən ibarət sənəd digər məsələlərlə yanaşı, anklavda müvəqqəti xarici idarəetmənin tətbiqini və beynəlxalq sabitlik qüvvələrinin yerləşdirilməsini tələb edir.
