Gürcüstanın Baş Prokurorluğu çirkli pulların yuyulmasında ittiham olunan sabiq baş nazir İrakli Qaribaşvilidən 1 milyon lari (təxminən 370 min 400 dollar) girov tələb edib.
Medialive Gürcüstan mediasına istinadən xəbər verir ki, bu barədə baş prokuror Giorgi Qvarakidze məlumat verib.
“Prokurorluq Qaribaşvili üçün 1 milyon lari girov təyin edilməsi üçün məhkəməyə vəsatət verib ki, bu da pul və ya daşınmaz əmlakla təmin oluna bilər”, – Qvarakidze deyib.
Gürcüstan Baş Prokurorluğu bundan əvvəl Qaribaşvilinin, Dövlət Təhlükəsizlik Xidmətinin (DTX) keçmiş rəhbəri Qriqol Liluaşvili və keçmiş baş prokuror Otar Partsxaladzenin, eləcə də onlarla əlaqəli səkkiz şəxsin evlərində axtarış aparıldığını bildirib. Daha sonra DTX keçmiş məmurların və onların ailə üzvlərinin evlərindən 7 milyon dollar, 198 bahalı əşya və saatlar, qiymətli rəsmlər, minlərlə səhifə sənəd, 50 mobil telefon və 119 elektron cihaz müsadirə etdiyini bildirdi. Prokurorluq daha sonra əlavə 4 milyon dollar ələ keçirildiyini bildirib.
Qeyd edək ki, 2024-cü ildə Qaribaşvilini Kobaxidze əvəz edib.
Qaribaşvili hakim “Gürcü Arzusu – Demokratik Gürcüstan” partiyasının rəhbəri postunda Kobaxidzenin yerinə keçib və apreldə siyasətdən getdiyini bəyan edib.
O, 2013-2015-ci illərdə və 2021-2024-cü illərdə Gürcüstanın baş naziri olub. O, müxtəlif vaxtlarda həm daxili işlər naziri, həm də müdafiə naziri vəzifələrində çalışıb.
