Amerika silahlı qüvvələrinin birbaşa iştirakını əhatə edən döyüş əməliyyatlarına başlamaq üçün Konqresin təsdiqi tələb olunur.
Pentaqon katibi Pete Hegseth sosial mediada yazıb ki, narkotik alveri ilə məşğul olanlar üçün nə sığınacaq, nə bağışlanma olacaq – yalnız ədalət.
“Əl-Qaidə bizim vətənimizdə müharibə apardığı kimi, bu kartellər də bizim sərhədimizdə və xalqımıza qarşı müharibə aparırlar” – deyə Heqset qeyd edib.
“Guardian” yazır ki, analitiklər narkotik vasitələrin qanunsuz dövriyyəsi ilə mübarizənin Trampın narkoterrorçu adlandırdığı Maduronu devirmək cəhdi üçün bəhanə olduğunu irəli sürüblər.
Hərbi münaqişədən qaçmaq üçün Venesuela hakimiyyəti sakitcə Vaşinqtona neft və digər təbii sərvətlərinin bir hissəsini təhvil verməyi və Amerika şirkətlərinə onları respublikada işlətməyə icazə verməyi təklif etdi.
Oktyabrın 10-da The New York Times qəzetinin yazdığına görə, Tramp administrasiyası bu təklifi rədd edib və Karakasla diplomatik əlaqələri dayandırıb.
Maduro bəyan edib ki, Vaşinqton kukla rejim qurmaq üçün müharibəyə başlamaq istəyir.
“Bütün dünya hərbçiləri İqla-S-nin gücünü bilir. Venesuelanın əsas hava hücumundan müdafiə mövqelərində ən azı 5000 İqla raketi var. Xalqımız üçün sülh, sabitlik və əmin-amanlığı təmin etmək üçün. 5000-dən çox. Anlayanlar, anlasınlar”, – VTV agentliyi Maduronun sözlərini sitat gətirib.
ABŞ sentyabrın əvvəlindən Karib hövzəsində hərbi mövcudluğunu əhəmiyyətli dərəcədə artırıb və Venesueladan narkotik ticarəti ilə məşğul olduğu iddia edilən gəmilərə zərbələr endirməyə başladı.
ABŞ-nin doqquz zərbəsi nəticəsində 37 nəfər həlak olub. Tramp və Pentaqon rəhbəri oktyabrın 24-də keçirdiyi brifinqdə bütün qurbanların narkoterrorçular olduğunu bildiriblər.
Rəsmi Moskva ABŞ-nin Venesuela sərhədləri yaxınlığında hərbi birləşmələri ilə bağlı mənfi fikirlər bildirib.
Rusiya Xarici İşlər Nazirliyinin sözçüsü Mariya Zaxarova bəyan edib ki, Vaşinqtonun hərəkətləri ümumi təhlükəsizliyə təhdid yaradır.
“Bu, biznesin aparılmasının tamamilə qəbuledilməz üsuludur, bütün cəbhələrdə, o cümlədən siyasi manipulyasiya baxımından açıq-aşkar təzyiqdir”, – diplomat Şərq İqtisadi Forumunda deyib.
Zaxarova əlavə edib ki, Qərb Karakasa qarşı sanksiyalar və hərbi-siyasi təzyiqlər edir, çünki o, ölkədəki seçkilərin nəticələrindən narazıdır.
“Vəziyyət, təəssüf ki, qəbuledilməz şəkildə gərginləşir və regional və ümumi təhlükəsizliyə təhdid yaradır”, – deyə Zaxarova vurğulayıb .
Qeyd edək ki, oktyabrın 21-də Rusiya Dövlət Duması Putin və Maduro arasında Moskvada keçirilən danışıqların yekunu üzrə Rusiya ilə Venesuela arasında strateji tərəfdaşlıq sazişini ratifikasiya edib .
Sənəd siyasi və iqtisadi sahələrdə, o cümlədən enerji, mədənçıxarma, nəqliyyat və kommunikasiyalar, eləcə də təhlükəsizlik sahəsində əməkdaşlığı əhatə edir.
