“İran ABŞ-nin əməkdaşlıq tələblərini yalnız İsraili dəstəkləməkdən və Yaxın Şərqin daxili işlərinə qarışmaqdan əl çəkəcəyi təqdirdə nəzərdən keçirəcək”.
Medialive xəbər verir ki, bu fikirləri İranın ali dini lideri Ayətullah Əli Xamenei iranlı tələbələr qarşısında çıxışı zamanı deyib.
“İran və ABŞ arasında mövcud fikir ayrılıqları iki ölkə arasında köklü maraqların toqquşmasını göstərir. İran ABŞ-nin İslam Respublikası ilə əlaqə qurmaq xahişlərini yaxın gələcəkdə deyil, nə vaxtsa gələcəkdə, Vaşinqton İsrailə dəstəyini tamamilə dayandırdıqda, Yaxın Şərqdəki hərbi bazalarını ləğv etdikdə və artıq region ölkələrinin daxili işlərinə qarışmadıqda nəzərdən keçirəcək”, – Xamenei qeyd edib.
Qeyd edək ki, bundan öncə İranın xarici işlər naziri Abbas Əraqçi Əl-Cəzirə telekanalına bildirib ki, Tehran ABŞ dürüst dialoqa hazır olduqda nüvə danışıqlarını bərpa etməyi nəzərdən keçirəcək.
