Müasir dövrün tələbləri ilə ayaqlaşmaq istəyən hər bir kəs sosial şəbəkə istifadəçisidir. Kimisi maraqdan, kimisi boşluqdan, kimisi işindən, kimisi də özünü reklam etmək üçün gününün bir çox saatını sosial şəbəkədə keçirir. Artıq elə bir dövür gəlib ki, biz müəllimi, ustanı, vəkili, hətda həkimi də sosial şəbəkəyə görə qiymətləndirir və seçirik. Bəs bu hal bizə necə təsir edir? Həqiqətənmi sosial şəbəkə üzərindən özlərini PR edən bu şəxslər öz sahələrinin peşəkarıdır? Onlar bizi aldadır, yoxsa həqiqətənmi vəzifəyə, bu peşəyə sahibdirlər. Gördükləri iş göz örtmək üçündür? Yoxsa sadəcə göstəriş?!
Məsələyə bir az həssas yanaşsaq və bizim üçün ən dəyərli olan insan həyatını göz önünə gətirsək, bu işə ilk olaraq həkimlərdən başlamaq lazımdır. Çünki insan həyatından daha önəmli həyatda heçnə yoxdur.
Müasir dövr dedik və həkim dedikdə ağıla ilk olaraq son dövrlər xanımların daha çox üz tutduğu kosmetoloqlar gəlir.
Bu günə qədər yüzlərlə qadın qeyri-peşəkar kosmetoloq və həkimlərin həyata keçirdiyi prosedurların qurbanı olub. Prosedurların düzgün icra edilməməsi, qeyri-peşəkarlıq və digər səbəblər nəticəsində zərərçəkənlərin bədənində çürümə və irinləmə halları müşahidə olunur.
Buna əsas səbəb isə bir çox “kosmetoloqların” qeyri-peşəkarlığı və özlərini sosial şəbəkələrdə “mükəmməl” göstərərək insanları aldatmalarıdır.
Adı tez-tez qalmaqallarda hallanan estetik kosmetoloq Rəna Soltanova ilə bağlı demək olar ki, hər gün yeni məlumatlar yayılır. Onun prosedurlarının qurbanı olmuş şəxslər davamlı olaraq açıqlamalar verir, ittihamlar səsləndirirlər.
Bu dəfə isə, “qəhrəmanımız” özünü sosial şəbəkədən “Turan Dövlətləri Tibbi Federasiyası”nın Azərbaycan üzrə estetik kosmetalogiya sahəsi üzrə rəhbəri kimi təqdim edib. Halbuki, belə bir Federasiyanın varlığına heç bir rəsmi mənbədə rast gəlmək mümkün deyil.
Bununla bağlı, Rəna Soltanovanın qeyd etdiyi “Turan Dövlətləri Tibbi Federasiyası”nın rəhbəri, professor Şahmar Milaniyə də sorğu göndərdik. Amma sorğumuz gözlədiyimiz kimi cavabsız qaldı.
Belə ki, özünü haqqında heç bir məlumat olmayan, hətda haqqında müsbət və ya mənfi bir informasiyaya rast gəlinməyən bu naməlum Federasiyanın vəzifəli şəxsi kimi təqdim edən Rəna Soltanova bu səfər insanları, izləyiciləri və ən əsası posientləri bu yolla özünə cəlb edərək yeni qurbanlar axtarışına keçib.
Görünən odur ki, artıq özünü hər cür PR edərək xəstələrini aldadan, onlara zərər vuraraq haqqında çıxan şikayət dolu xəbərləri həzm edə bilməyən kosmetoloq, çıxılmaz vəziyyətdə qaldığı üçün belə bir yola əl atır.
Mövcud vəziyyət bir daha sübut edir ki, estetik sahədə fəaliyyət göstərən şəxslərin peşəkarlığı və tibbi səlahiyyətləri ciddi şəkildə yoxlanmalı, insanların sağlamlığına cavabdeh olan bu sahədə nəzarət tədbirləri daha da sərtləşdirilməlidir. Həm pasiyentlərin hüquqları, həm də cəmiyyətin ümumi sağlamlığı naminə bu məsələ diqqətlə izlənilməli və cavabdehlik mexanizmləri daha təsirli şəkildə tətbiq olunmalıdır.
\\\Veteninfo.az
