Ukrayna prezidenti Vladimir Zelenski sosial şəbəkədə Azərbaycan Prezidenti İlham Əliyevlə telefon danışığı keçirdiyini bildirib.
Medialive.az musavat.com-a istinadən xəbər verir ki, Zelenskinin sözlərinə görə, Rusiya bu gecə Ukrayna ərazisinə qarşı yüzlərlə pilotsuz uçuş aparatı və raket, o cümlədən ballistik tipli silahlar tətbiq edib. Hücumlar nəticəsində müxtəlif obyektlərə ziyan dəyib və həmin ziyanlar arasında Azərbaycanın Kiyevdəki səfirliyi də yer alıb.
Zelenski açıqlamasında qeyd edib ki, İlham Əliyev səfirliyə qarşı edilən zərbəni qınayıb və bunun Rusiyanın Azərbaycanla bağlı diplomatik nümayəndəlikləri və əmlakları hədəfə almasının ilk nümunəsi olmadığını vurğulayıb.
Ukrayna lideri bildirib: “Cənab Prezident bu hücumu qətiyyətlə pislədi və xatırlatdı ki, ruslar təkcə səfirliyə deyil, Azərbaycanın digər obyektlərinə də əvvəllər atəş açmışdılar”.
Telefon danışığında tərəflər həmçinin Azərbaycan–Ukrayna münasibətlərinə toxunublar. Zelenskinin sözlərinə görə, iki ölkə arasında siyasi, iqtisadi və təhlükəsizlik sahələrində əməkdaşlığın genişləndirilməsi istiqamətində “bütün istiqamətlər üzrə yaşıl işıq” mövcuddur. O, Azərbaycanla tərəfdaşlığın böyük potensiala malik olduğunu və qarşılıqlı planların həyata keçiriləcəyini bildirib.
Hadisə ilə bağlı Ukrayna hüquq-mühafizə orqanları araşdırma aparır. Azərbaycanın Kiyevdəki diplomatik nümayəndəliyində dəymiş ziyanın qiymətləndirilməsi davam etdirilir.
