Azərbaycanda 15 yaşı tamam olan oğlanların hərbi qeydiyyata alınması ilə bağlı yeni qaydalar təsdiqlənib. Baş nazir Əli Əsədovun imzaladığı qərara əsasən bu proses hər il yanvar ayından may ayına qədər davam edəcək.
Medialive.az xəbər verir ki, yeniliyə görə yeniyetmələr yaşadıqları yer üzrə Səfərbərlik və Hərbi Xidmətə Çağırış üzrə Dövlət Xidmətinin şöbələrinə müraciət etməlidirlər. Bu addım gənclərin sağlamlıq vəziyyətini yoxlamaq və gələcək xidmət üçün resursları müəyyən etmək məqsədi daşıyır. Əgər yoxlanış zamanı hər hansı sağlamlıq problemi aşkarlanarsa həmin şəxslərin müalicəsi təşkil olunacaq.
Qeydiyyat üçün tələb olunan sənədlərin siyahısı aşağıdakı kimidir.
Doğum haqqında şəhadətnamənin surəti
Ailə tərkibi və təhsil haqqında arayışlar
İş yerindən arayış (işləyənlər üçün)
Tərcümeyi-hal
6 ədəd fotoşəkil (3×4 ölçüdə)
Qeyd edək ki, rəqəmsallaşma sayəsində bir çox sənədləri kağız formasında daşımağa ehtiyac qalmayacaq. Əgər tələb olunan məlumatlar Elektron Hökumət İnformasiya Sistemində mövcuddursa dövlət qurumu həmin sənədləri vətəndaşdan tələb etmədən birbaşa sistemdən götürəcək. Sistemdə tapılmayan sənədlər isə ya vətəndaşın razılığı ilə müvafiq qurumlardan sorğu ediləcək ya da şəxs tərəfindən təqdim olunacaq.
