Azərbaycan Dövlət Akademik Opera və Balet Teatrı 2022-ci ilin may ayında təmirə bağlanıb. Aradan 4 ilə yaxın vaxt keçsə də, binada təmir işləri hələ yekunlaşmayıb.
“Yeni Sabah” prosesin nə vaxt yekunlaşacağı ilə bağlı Azərbaycan Dövlət Akademik Opera və Balet Tetatrı ilə əlaqə saxlayıb.
Teatrın Mətbuat xidmətindən bu barədə heç bir məlumatları olmadığını, məsələyə yalnız Mədəniyyət Nazirliyinin aydınlıq gətirə biləcəyi söylənildi.
Mədəniyyət Nazirliyindən sorğumuza cavab olaraq bildirildi ki, Azərbaycan Dövlət Akademik Opera və Balet Teatrı binasında aparılan əsaslı təmir-bərpa işləri planlı şəkildə və mərhələlər üzrə davam etdirilir:
“Proses davam edir, işlər layihəyə uyğun olaraq texniki və memarlıq baxımından xüsusi dəqiqlik tələb edən istiqamətlər üzrə icra olunur. Binanın təhvil verilməsi üçün aparılan işlərin müəyyən edilmiş qrafik çərçivəsində yekunlaşdırılması nəzərdə tutulur.
Nəzərə almaq lazımdır ki, belə tarixi və funksional baxımdan mürəkkəb mədəniyyət obyektlərinin bərpası yalnız tikinti işləri ilə məhdudlaşmır, bu proses akustika, səhnə avadanlıqları və təhlükəsizlik sistemlərinin müasir standartlara uyğun şəkildə yenilənməsini də əhatə edir. Bu baxımdan layihə yüksək peşəkarlıq və ardıcıl yanaşma tələb edir”.
Nazirlikdən bildirilib ki, hazırkı dövrdə teatrın repertuar tamaşaları paytaxtın müxtəlif səhnələrində, o cümlədən Heydər Əliyev Sarayı və digər uyğun mədəniyyət məkanlarında təqdim olunur.
Xatırladaq ki, Azərbaycan Dövlət Akademik Opera və Balet Teatrının binasının əsası XX əsrin əvvəllərində qoyulub. Belə ki, 1910-cu ildə Bakı milyonçuları olan Mayılov qardaşlarının təşəbbüsü ilə binanın tikintisinə başlanılıb. Hacı Zeynalabdin Tağıyev bildirir ki, belə bir binanı bir ilə tikmək qeyri-mümkündür. Mərc gəlirlər ki, əgər Opera Teatrı vaxtında hazır olsa, onun bütün xərclərini Tağıyev çəkəcək.
Beləliklə, cəmi on ay ərzində, 1910–1911-ci illərdə memar N.Q.Bayevin layihələndirdiyi teatr binası hazır olur. Azərbaycanda ən böyük musiqili teatr olan Azərbaycan Opera və Balet Teatrı 1920-ci ildən bu günədək bu binada fəaliyyət göstərir. 1928-ci ildə teatra M.F.Axundovun adı verilsə sə, bu bina 1959-cu ildən Akademik Opera və Balet Teatrı adlanır.
Qeyd edək ki, teatr binası sonuncu dəfə 1987-ci ildə əsaslı təmir olunub. 2022-cü ildə isə teatrda yenidən təmir işlərinə başlanılıb.
