BMT rəsmi olaraq təşkilatın yeni Baş katibinin seçilməsi prosesinə başlayıb.
Medialive xəbər verir ki, bu barədə BMT Baş Assambleyasının sədri Annalena Berbok BMT Baş Assambleyası və Təhlükəsizlik Şurasında məktubla çıxış edib.
Sənəd noyabr ayı üçün Syerra Leonenin BMT-dəki daimi nümayəndəsi və BMT Təhlükəsizlik Şurasının sədri Maykl İmran Kanu tərəfindən də imzalanıb.
Məlumata görə, Baş Assambleyanın sədri və Təhlükəsizlik Şurasının sədri birgə məktubda BMT-yə üzv dövlətləri 2027-ci il yanvarın 1-dən fəaliyyətə başlayacaq dünya təşkilatının baş katibi vəzifəsinə namizədlər irəli sürməyə dəvət ediblər. Məktubda üzv dövlətlər qadınların namizəd kimi irəli sürülməsi məsələsini ciddi şəkildə nəzərdən keçirməyə çağırılır.
