Xəbər verdiyimiz kimi, bu gün Azərbaycanda “Dialoqun, əməkdaşlığın və regional həmrəyliyin təşviq edilməsi” mövzusunda D-8 Media Forumu keçirilir.
Prezident bu forumun iştirakçılarına müraciət edərək media haqqında danışıb.
O bildirib ki, hazırkı media transformasiya edir.
Amma xarici mediada dezinformasiyalar, “deepfake”lər yayılır, eyni zamanda süni intellektin imkanları yanlış istiqamətlərə sərf edilir.
Dövlət başçısı qeyd edib ki, bu amillər ölkələrin imicinə, daxili həyatına ciddi təsir göstərməklə yanaşı, bütövlükdə beynəlxalq sabitliyə zərbə vurur və ölkələr arasında etimadı sarsıdır.
Bəs, beynəlxalq medianın saxta informasiyalar yayması nəyə hesablanır?
Xüsusən də son illər ərzində Azərbaycana qarşı həqiqətləri əks etdirməyən informasiyalar kifayət qədərdir.
Buna daha çox 44 günlük Vətən Müharibəsi dönəmində rast gəlirdik.
Məsələ ilə bağlı “Crossmedia.az” xəbər portalının rəhbəri Mübariz Göyüşlü Medialive.az-a açıqlama verib.
Baş redaktor açıqlamasında qeyd edib ki, hər hansı xəbər saytı jurnalistika prinsiplərinə – obyektivlik, operativliyə və maarifləndirməyə əməl etmirsə, bayağı işlərlə məşğuldursa, onu media adlandırmaq doğru deyil:
“Medianın əsas işi doğru, dürüst informasiya təqdim etməkdir. Xəbər çatdırmaq, maarifləndirməkdir. Əgər bu funksiyaları yerinə yetirmirsə, saxta xəbər verirsə, yanlış yerlərə yönləndirirsə, maarifləndirmə funksiyasını icra edə bilmirsə, o media deyil. Bu, artıq dezinformasiya ilə məşğul olan, ictimai rəydə çaşqınlıq yaradan bir qurumdur. Bu baxımdan, sadaladıqlarım hər kəsə aiddir. İstər beynəlxalq media, istərsə də yerli media resursları olsun. Bu elementlərə əməl etməyən xəbər tirajlayan resursların media adlandırılması birmənalı düz deyil”.
Sayt rəhbəri bildirib ki, Azərbaycan Prezidentinin müraciətində qeyd olunan məsələlər çox önəmli sayılır:
“Dünyaya demokratiya, insan hüquqları dərsi keçmək istəyən beynəlxalq media qurumlarının, təşkilatlarının da bu mənada özlərinin irəli sürdükləri prinsiplərin əleyhinə getməsini pisləyirəm, mənfi hal kimi qiymətləndirirəm. Azərbaycan Prezidentinin müraciətində qeyd olunan məsələləri çox önəmli sayıram. Hesab edirəm ki, dünyanın aparıcı media institutları media ənənələrinə, qaydalarına, üslubuna uyğun davranış göstərməlidirlər”.
Mikayıl Mirzəzadə
