“Greenville premium” yaşayış kompleksindən redaksiyamıza şikayət daxil olub.
Medialive.az xəbər verir ki, Yeniera.az-a müraciət edən yaşayış kompleksinin sakinləri bildiriblər ki, binada hazırda xeyli həllini tapmamış problemlər mövcuddur.
Sakinlər qeyd edir ki, intensiv yağışlar yağarkən mənzilləri su basır.
Dünəndən yağan aramsız yağışlar sakinlərin mənzillərindəki əşyalarına ciddi ziyan vurub.
Binada yaşayan sakinlərin sözlərinə görə, onlar hər dəfə təkrarlanan bu xoşagəlməz halla əlaqədar binanın komendantına dəfələrlə müraciət etsələr də, heç bir addım atılmayıb.
MTK rəhbərliyi də yaranmış bu vəziyyətlə bağlı heç bir tədbir görmür. Sakinlər vurğulayıb ki, MTK-nın ərazisində sular çox kirli və qumlu gəlir. Onlar öz hesablarına filtr su sistemləri alaraq istifadə edirlər.
Sakinlərdən birinin dediyinə görə, ən böyük problemlərdən biri də binanın damına yığılan sulardır. Bu sular liftin şaxtasına tökülür və liftlərin heç biri işləmir. Yuxarı mərtəbədə yaşayan sakinlər üçün isə bu, çox böyük problemlərə çevrilir.
Sakinlərin qənaətinə görə, bina rəhbərliyi sakinlərin şikayətlərinə etinasız yanaşır və bu problemlərin həlli istiqamətində heç bir real addım atmır.
Şikayətdə o da bildirilib ki, kompleksin 3 ildir istifadəyə verilməsinə baxmayaraq, ətrafda heç bir mağaza, iaşə obyekti yoxdur. Hər dəfə bu məsələ qabardıldıqda bina rəhbərliyindən sakinlərə deyilir ki, məsələ qısa zamanda öz həllini tapacaq.
Sözügedən problemlərlə bağlı “Greenville premium” yaşayış kompleksinin rəhbərliyinin mövqeyini işıqlandırmağa hazırıq.
Mövzunu diqqətdə saxlayacağıq.
Məsələ ilə bağlı video və foto materialları təqdim edirik:
