“İran ABŞ ilə nüvə danışıqları hörmətlə aparılarsa, onları bərpa etməyə hazırdır”.
Medialive xəbər verir ki, bu sözləri CNN-ə müsahibəsində İranın Xarici Əlaqələr üzrə Strateji Şurasının rəhbəri Kamal Xərrazi deyib.
“ABŞ bizim irəli sürdüyümüz şərtlər əsasında bizimlə əməkdaşlığa hazır olduqlarını göstərmək üçün ilk addımı atmalıdır. Bu, bərabərlik və qarşılıqlı hörmətə əsaslanmalıdır”, – deyə Xərrazi deyib.
“Gündəm müzakirələrin mahiyyəti və prosesinin aydınlığını təmin etmək üçün əvvəlcədən hazırlanacaq. Təəssüf ki, ABŞ Prezidenti Donald Tramp diplomatik əlaqəyə inanmır, öz məqsədlərinə çatmaq üçün gücdən istifadə etməyə üstünlük verir”, – Xərrazi qeyd edib.
O, həmçinin iyun ayında ABŞ və İsrailin nüvə obyektlərinə zərbə endirdikdən sonra İranın Vaşinqtonla danışıqlar şərtlərinin dəyişmədiyinə işarə edərək, uranın zənginləşdirilməsinin davam edəcəyini, çünki ölkənin elektrik stansiyaları və tibbi məqsədlər üçün yanacağa ehtiyacı olduğunu bildirib. Onun sözlərinə görə, Tehranın ballistik raket proqramı da danışıqların gündəmindən çıxarılacaq.
“Biz yalnız ABŞ ilə nüvə məsələsini müzakirə edəcəyik”, – deyə Xərrazi bildirib.
CNN-nin İranın nüvə proqramı, o cümlədən potensial konsorsiumla bağlı ABŞ ilə razılığa gəlmək imkanının olub-olmaması ilə bağlı sualına Xərrazi belə cavab verib: “Mən belə düşünürəm”.
“Əgər İran və ABŞ arasında həqiqi danışıqlar başlasa, İranın uranın zənginləşdirilməsini davam etdirməsini təmin etmək üçün yollar və vasitələr var, eyni zamanda, başqalarını onun nüvə silahı əldə etmək niyyətində olmadığına inandırmaq olar”, o əlavə edib.
Xərrazi Trampa da müraciət edib.
“İrana müsbət yanaşma ilə başlayın. Müsbət olarsa, şübhəsiz ki, qarşılıq veriləcək. Amma bunun üçün onlar İrana qarşı hər hansı güc tətbiq etməkdən çəkinməlidirlər. Onlar bunu artıq sınaqdan keçiriblər və indi bunun qəbuledilməz və qeyri-mümkün olduğunu başa düşürlər”, – o deyib.
