Ötən gün dünyada neft qiymətləri artaraq 120 dollara çatıb.
Lakin günün sonunda bu rəqəm yenidən aşağı enib.
Bu gün yenidən dünya bazarlarında “Azeri Light” (CIF) markalı Azərbaycan nefti ucuzlaşıb.
Bəs, neft qiymətlərin sürətlə qalxıb-enməsi nə zaman dayana bilər?
Sözügedən artım ölkədə qiymətlərə necə təsir edə bilər?
Məsələ ilə bağlı iqtisadçı Xalid Kərimli Medialive.az-a açıqlama verib.
O, ötən gün neftin qiymətinin kəskin azalmasının səbəblərini izah edib:
“Dünən neftin qiymətinin niyə kəskin azaldığını izah edim. Ötən gün yaxşı qalxırdı, “Azeri Light” (CIF) markalı Azərbaycan nefti 120 dollar olmuşdu. Lakin günün sonunda kəskin azaldı. Qiymətlər sürətlə dəyişir. İran bomba atır neft qalxır, Tramp çıxıb vəd verir ki, müharibəni bitirəcəm, qiymət düşür”.
Ekspert neft qiymətlərinin sürətlə artıb-azalmasını Hörmüz boğazı ilə əlaqələndirib:
“Dünyada neft gəlirlərinin artması Hörmüz boğazının bağlanmasından, azalması müharibənin bitməsindən asılıdır. Hörmüz boğazının bəlli zamanadək bağlanıldığı elan edilsə, demək mümkün olar ki, neftin qiyməti arta-arta gedəcək. Hətta nəticədə 150 dollara qalxa bilər. Çünki bu bir günə 25 dollar qalxdı, düşdü. Müharibə tezliklə bitsə isə, neft yenidən 70 dollara qayıda da bilər, 120 dollarda qala da bilər. Hamısı mövcud geosiyasi proseslərdən asılıdır”.
Leyla Cəfərova
