Jurnalist Mikayıl Mirzəzadə yazır…
Ötən gün Ermənistanla həqiqi sülhün əldə edilməsi istiqamətində SÜLH Şurasının iclasına qatılmaq üçün ABŞ-yə yollanan möhtərəm cənab Prezident İlham Əliyevə qarşı ədalətsiz və mənəviyyatsız təxribat törədən şəxslərə Azərbaycanın çörəyi haram olsun.
Düşünürəm ki, illərdir düşmənin tapdağı altında qalan, yenicə dirçələn torpaqları öz sahiblərinə geri qaytaran ağıllı dövlət başçısına qarşı bu cür tərbiyəsiz addım atmaq elə dövlətinə və millətinə əsl xəyanət etməkdir. Çünki illərdir bütöv Azərbaycan həsrəti ilə yaşayan millətə bu şadlığı qaytarmaq çox əziyyətli və çətin tapşırıq olub.
O təxribatçılar anlamalıdır ki, İlham Əliyev həm də onların qeyrətini, namusunu, azadlığını geri alıb. Məgər, onlar azərbaycanlı deyildilərmi? Qarabağ dərdi onların dərdinə çevrilməmişdimi? Prezident bu xalq üçün, məhz siz haqsız üsyançılar üçün çox şeylər edib. Sadəcə nankorluq qandan gəldiyi üçün siz bunu anlamadınız. Bu gün hansısa siyasi institut tərəfindən şəbəkəli şəkildə çalışan, maliyyələşən xainlər dövlət başçısının nüfuzuna xələl gətirməyə çalışdılar. Çox şadıq ki, bu biabırçı təşəbbüs baş tutmadı və cənab Prezidentin mühafizə xidmətinin əməkdaşları sonacan vuruşaraq, mübarizə apararaq bu satqınları yerlərinə oturtdular.
Eyni zamanda qeyd etmək lazımdır ki, insanın ən aciz halı onun nalayiq ifadələr işlətməsidir. Özünə düşmən hesab etdiyin şəxsə qarşı belə gərək dürüst olasan, onu və çevrəsini təhqir etməyəsən. Çünki söyüş söyən adam ləyaqətsiz, heç zaman mövqeyi olmayan, həqiqəti əsaslandıra bilməyən cahildir. Aydın olur ki, söyüş müxalifəti burada da iz qoydu. Qabil, Məhəmməd, Tural və Mehman kimi dövlətini satan adamların bu gün badına gedən adamlar elə “adamdırlar”. Onların şəxsiyyət olması üçün nə isə lazım deyil.
Mehman Hüseynovun son həftələr Prezident və onun ailəsinə qarşı davranışı, həqiqəti əks etdirməyən videolar paylaşması onun bir daha nə qədər xəstə və zəif adam olduğunu göstərdi. Bu gün Mehman kimilər üçün fakt meyarı ən ucuz oyuncaqdır. Özünü illərdir jurnalist hesab edən şəxs faktla şayiənin fərqinə vara bilmir. Qanunda da bu vurğulanır ki, insanların şəxsi həyatı toxunulmazdır. Bundan vasitə kimi istifadə etmək qəti qadağandır.
Hesab edirəm ki, bugünkü xoşagəlməz hadisəni törətməyə çalışan həmin şəxslər dərslərini alıblar və ümid edirik ki, bir daha belə iğtişaşlar yaratmağı ağıllarından keçirməzlər.
