Gəncə şəhərində yaşayan Şəhran Mehdizadə keçmiş həyat yoldaşından şikayətçidir.
Medialive.az xəbər verir ki, Yeniera.az-a müraciət edən, əslən iranlı olan Gəncə şəhər sakini Şəhran Mehdizadə bildirib ki, onun üç övladının – 14 yaşlı Fatimə, 11 yaşlı Əlirza və 9 yaşlı Məsumənin həyat və sağlamlığı ciddi risk altındadır.
Belə ki, redaksiyamıza şikayət xarakterli məktub ünvanlayan Ş.Mehdizadə qeyd edib ki, o, beş il öncə həyat yoldaşından boşanıb və məhkəmə uşaqların qəyyumluğunu anasına verib.
Lakin Mehdizadə iddia edir ki, uşaqların anası narkotik vasitələrdən istifadə edir və övladlarını xəbərsiz şəkildə Bakı şəhərinə apararaq onları təhlükəli və baxımsız mühitdə saxlayır.
Çarəsiz ata müraciətində əlavə edib ki, uşaqlar hazırda ac-susuz, təhsildən tamamilə kənarda qalıblar. O vurğulayıb ki, Gəncə şəhər 20 saylı tam orta məktəb rəhbərliyinə də bu barədə məlumat verib.
Ş.Mehdizadənin sözlərinə görə, onun övladlarına təhsil verməsi və normal yaşaması üçün maddi durumu yetərlidir.
Azyaşlıların atasının dediklərinə əsasən, o, keçmiş həyat yoldaşının övladlarını harada saxladığını da tapa bilib:
“Uşaqlarımı gedib tapmışam, anaları ilə birlikdə Bakının Binə qəsəbəsində qalırlar. Həmçinin o qadının “sevgilisi” var. Uşaqlar onun sevgilisi, eyni zamanda Əkbər, Vüsal və Günay adlı qadın tərəfindən zor gücünə orada saxlanılır. Ora yaxınlaşdıqda onlar mənə də hücum etdilər”.
Ş.Mehdizadə sonda aidiyyati qurumlardan xahiş edib ki, övladlarının qəyyumluğunu ona verilsin və bu məsələyə dərhal müdaxilə edilsin.
Məsələ ilə bağlı aidiyyatı qurumlara məlumat verilib. Sözügedən məsələnin araşdırılması istiqamətində araşdırma aparılır.
