Rusiyanın ən böyük hava limanlarında əsas məqsədi immiqrasiya qanunlarını pozan əcnəbiləri müəyyən etmək olan 12 immiqrasiya məntəqəsi fəaliyyətə başlayıb.
Medialive TASS-a istinadən xəbər verir ki, bu barədə Rusiya Daxili İşlər Nazirliyinin sözçüsü İrina Volk deyib.
“Ölkənin ən böyük hava limanlarında ilk 12 immiqrasiya nəzarət məntəqəsi fəaliyyətə başlayıb. Bunlara Moskva hava qovşağı, həmçinin Sankt-Peterburq, Soçi, Kazan, Novosibirsk, Krasnoyarsk, Yekaterinburq və digər şəhərlərdəki hava limanları daxildir”, – o, Teleqram kanalında yazıb.
Volk əlavə edib ki, Rusiya Daxili İşlər Nazirliyinin Miqrasiya Xidməti və Rusiya Daxili İşlər Nazirliyinin Nəqliyyat üzrə Baş İdarəsinin koordinasiya etdiyi daxili işlər orqanlarının miqrasiya nəzarəti məntəqələri də sərhəd dəmir yolu stansiyalarında, su və yol keçidlərinin yaxınlığında açılacaq.
“Onların əsas vəzifəsi miqrasiya qanunlarını pozan əcnəbi vətəndaşları müəyyən etməkdir”, – deyə nümayəndə əlavə edib.
