Son dövrlər televiziyalarda yayımlanan şou proqramları ilə bağlı müəyyən qaydaların hazırlanması istiqamətində işlərin aparılması ümumilikdə müsbət addım kimi qiymətləndirilir. Televiziya cəmiyyətə təsir edən ən güclü informasiya və əyləncə vasitələrindən biri hesab olunur və bu səbəbdən efirdə yayımlanan verilişlərin məzmunu müəyyən etik və peşəkar normalara uyğun olmalıdır.
“İnkişafa və İslahatlara Dəstək” İctimai Birliyinin sədri Ramil Əliyev QHT.az-a açıqlamasında bildirib ki, bəzi hallarda şou proqramlarında şəxsi həyatın həddindən artıq müzakirə edilməsi, sensasiya xatirinə səviyyəsiz mövzulara yer verilməsi və etik qaydaların pozulması kimi hallar tamaşaçılar tərəfindən haqlı olaraq tənqid edilir. Onun sözlərinə görə, bu baxımdan qaydaların hazırlanması televiziya məkanında keyfiyyətin və məsuliyyətin artmasına kömək edə bilər.
O qeyd edib ki, belə qaydalar həm aparıcıların, həm də prodüserlərin məsuliyyətini artıraraq verilişlərin daha peşəkar şəkildə hazırlanmasına şərait yarada bilər. Eyni zamanda bu addım cəmiyyətin, xüsusilə uşaqların və yeniyetmələrin mənəvi mühitinin qorunmasına da müsbət təsir göstərə bilər. Onun fikrincə, şou proqramlarında etik davranış və istifadə olunan dil ilə bağlı konkret standartların müəyyənləşdirilməsi vacibdir.
Ramil Əliyev əlavə edib ki, verilişlərin məzmununa uyğun yaş məhdudiyyətlərinin tətbiqi və bəzi mövzuların daha gec saatlarda yayımlanması da faydalı addım ola bilər. Bununla yanaşı, televiziya proqramlarında yalnız qalmaqal xarakterli mövzulara deyil, maarifləndirici və mədəni məzmunlara da daha çox yer verilməsi məqsədəuyğundur.
O vurğulayıb ki, tamaşaçıların rəy və təkliflərinin nəzərə alınması üçün xüsusi mexanizmlərin yaradılması da televiziya məkanının inkişafına töhfə verə bilər. QHT sədrinin sözlərinə görə, şou proqramları ilə bağlı qaydaların tətbiqi senzura məqsədi daşımamalı, əsas məqsəd keyfiyyətli, etik və cəmiyyət üçün faydalı televiziya mühitinin formalaşdırılması olmalıdır.
