“Trampın bu seçkilərdə məğlub olacağı gözlənilən idi. Çünki, hakimiyyətə gəldiyi zamandan indiyə qədər 10 ay keçib və seçki kampaniyası dövründə verdiyi vədlərin bir çoxunu yerinə yetirə bilməyib. Xüsusilə, Rusiya-Ukrayna savaşını bitirəcəyi barədə verdiyi vəd havadan asılı qalıb. Əslində, bu nəticə respublikaçılara bir tərs sillədir”.
Bu fikirləri Medialive.az-a açıqlamasında AĞ Partiya sözçüsü, siyasi şərhçi Cavanşir Abbaslı deyib.
Ekspertin fikrincə, bununla Trampın növbəti dönəm üçün hakimiyyətdə qalmaq planı suya düşəcək:
“Bu gedişlə onlar yenidən əsas postları prezidentlik daxil demokratlara uduzacaqlar və Trampın növbəti dönəm üçün də hakimiyyətdə qalmaq planı suya düşəcək. Digər tərəfdən artıq görünən odur ki, müsəlman əsilli şəxslər artıq Amerikada yüksək postlara gəlirlər, Nyu-Yorkun Amerika üçün önəmini sadalamağa gərək yoxdur. Belə bir şəhərdə bələdiyyə sədrinin müsəlman seçilməsi sıradan bir hadisə kimi qəbul olunmamalıdır”.
C.Abbaslı istənilən halda Amerika cəmiyyətində Trampa qarşı sərt etirazların baş qaldıracağını düşünmür:
“Düşünürəm ki, bu amil də Trampın nüfuzuna bir qədər təsir edəcək. O nəsə etməlidir. Əks halda yenə də bir dönəm üçün prezident postunda qalacaq. Amma istənilən halda Amerika cəmiyyətində Trampa qarşı sərt etirazların baş qaldıracağını düşünmürəm. Çünki, o etirazları körükləyəcək hələ nələrsə Tramp etməyib. Bir də unutmayaq ki, Trampın Ukrayna ilə bağlı Rusiyaya yönəlik siyasəti amerikan cəmiyyəti tərəfindən dəstəklənir”.
Mikayıl Mirzəzadə
