“ABŞ-də 4 noyabr seçkilərində demokratlar demək olar ki, bütün sahələrdə – qubernator, prokurorluq, mer, deputat, məhkəmə seçkilərində qələbə qazandılar. Tam doğrudur ki, Tramp ABŞ-də keçirilən növbədənkənar seçkilərdə məğlub oldu”.
Bu fikirləri Medialive.az-a açıqlamasında politoloq Elşad Həsənov deyib.
O bildirib ki, Trampın seçkilərdən məğlub olmasının bir çox səbəbi var:
“Bunun səbəbi Tramp hakimiyyətə gələndə apardığı qeyri-qanuni miqrant siyasətidir. Yəni Tramp ölkədən miqrantları illeqal formada ölkədən çıxarırdı, lakin məhkəmələr onun bu qərarını ləğv etdi. Trampın apardığı siyasətə qarşı ABŞ-nin 1200 ştat və şəhərlərində milyonlarl insanın iştirakı ilə mitinqlər keçirildi. Ona görə də məhz Trampın özünün iştirak etdiyi Nyu-Cersi, Virciniya ştatlarında qadın demokratlar Ebigeyl Spanberger və Miki Şeril qələbə çaldılar. Trampı Virciniyada istəməyənlərin sayı 55 faiz, Nyu-Cersidə isə 54 faizdir. Trampın apardığı siyasət Amerikanı güclü etmək idi. Amma, əksinə onun bu siyasəti nəticəsində Amerika xalqının vəziyyəti ağırlaşıb. Əhalinin bir qısmi maaşları ödənilmədən məzuniyyətə buraxılıb. Bu da özlüyündə ciddi narahatlıq yaradır. Təbii ki, bu seçkilərdən sonra ölkədə Trampa qarşı böyük narazılıqlar başlanacaq. Çünki Trampın xarici siyasətində də müəyyən çatışmazlıqlar var. Onun Rusiyaya rəğbət hissi amerikalıları sevindirmir, əksinə özünün siyasətdən üz döndərməyinə gətirib çıxara bilər. ABŞ əhalisinin böyük hissəsi Ukraynaya dəstək olmaq istəyir, lakin Tramp hakimiyyətə gələndən bəri bu barədə bir neçə dəfə fikrini dəyişib. Rusiya ilə ciddi qarşıdurma yaratmaq istəmir. Digər səbəblərdən də o, Rusiyaya lazımi dəstəyi göstərir”.
Siyasi ekspert qeyd edib ki, Trampın qisas əməlləri olub və bu səbəbdən artıq xalq ona etibar etmir:
“Yada salaq ki, Tramp prezident seçilən ərəfədə onun barəsində cinayət işləri açılmışdı. Məhkəmə istintaqı gedirdi. Sadəcə Amerika qanunlarına görə, Tramp prezident seçildiyinə görə həmin məhkəmə işləri dayandırılıb. Hesab edirəm ki, Tramp hakimiyyətdən getdikdən sonra məhkəmə işləri yenidən işini davam etdirəcək. Eyni zamanda Trampın hakimiyyətində qisas əməlləri də var. Federal Təhlükəsizlik Xidmətinin, Xarici Kəşfiyyat İdarəsinin bir çox əməkdaşlarını işdən azad edib. Bu da öz növbəsində ABŞ xalqının xoşuna gələn məsələlərdən olmayıb. Bu mənada, Tramp miqrantlara qarşı hərbçilərdən istifadə etmişdi. Ümumiləşdirsək, yenə qeyd edirəm ki, Tramp adminstrasiyasının seçkilərdə məğlub olması aparılan yanlış siyasətin nəticəsidir”.
Mikayıl Mirzəzadə
