Ukraynanın ABŞ-yə təqdim etdiyi sülh planının son versiyasında Rusiya və Ukrayna qoşunlarının Donbasdan çıxarılması və bölgədə azad iqtisadi zonanın yaradılması nəzərdə tutulur.
Medialive xəbər verir ki, bu barədə Politico məlumat yayıb.
Ağ Evin sözçüsü Kerolin Levitt bir gün əvvəl Trampın Ukraynanın təklif etdiyi planı nəzərdən keçirdiyini təsdiqləyib. Sənədin bu gün ABŞ, Ukrayna, Fransa, Almaniya və Britaniya tərəfindən müzakirəyə çıxarılacağı gözlənilir.
Eyni zamanda, Rusiya Donbasda azad iqtisadi zona yaratmaq təklifini qəbul etməyə bilər. Tramp Ukraynanı münaqişədə ən zəif tərəf kimi görür və bu, əsasən son korrupsiya qalmaqalına görədir.
İndiyə qədər Rusiya Prezidenti Vladimir Putin Kiyevdən müharibəyə son qoymaq üçün qoşunlarını Donbasdan çıxarmağı tələb edib. O, həmçinin qeyd edib ki, region tarixən Rusiya ərazisidir və Moskva tərəfindən hərbi və ya başqa şəkildə geri alınacaq.
Bu arada, Zelenski dekabrın 11-də Ukraynanın nəzarətində olan Donbas ərazilərində azad iqtisadi zona yaratmaq ideyasının ABŞ tərəfindən səsləndirildiyini açıqlayıb.
Onun sözlərinə görə, Vaşinqton Ukrayna qoşunlarının bu ərazidən çıxarılması və Rusiya qoşunlarının qalması kimi bir kompromis görür. Eyni zamanda, bu zonanı kimin idarə edəcəyi hələ də məlum deyil. Zelenski həmçinin vurğulayıb ki, Rusiyaya hər hansı ərazi güzəştləri ukraynalılar tərəfindən referendumda təsdiqlənməlidir.
