Rusiya-Ukrayma müharibəsi artıq 3 ildən çoxdur ki, davam edir.
Tərəflər arasında uzunmüddətli razılaşma ehtimalları yaransa da hələ də yekun sülh və atəşkəs sazişinin imzalanmasını görmürük.
Müharibə qeyri-bərabər şəkildə Rusiyanın lehinə işləyir, lakin Ukrayna tərəfi də təslim olmur və sonacan mübarizəsini davam etdirməyi qarşıya məqsəd qoyub.
Bir neçə gündür isə Rusiya-Ukrayna arasında sakitlik müşahidə olunur.
Ötən gün ABŞ Prezidenti Donald Tramp iddia edib ki, Ukrayna Rusiyaya qarşı hücumlara hazırlaşa bilər.
Bəs, Ukrayna revanş edərək torpaqlarını Rusiyadan geri ala bilərmi?
Məsələ ilə bağlı “Müasir İnkişaf” İctimai Birliyinin sədri, siyasi şərhçi Mübariz Göyüşlü Medialive.az-a açıqlama verib.
Ekspert bildirib ki, hazırda Ukraynanın revanş cəhdləri edərək torpaqlarını bütövlükdə işğaldan azad etməsi real görünmür:
“Mən bu situasiyada Ukraynanın revanş etməyə cəhd edərək öz torpaqlarını azad etməsinə və bunun uğurlu olacağına inanmıram. Gedişat da onu göstərir. Düzdür, Ukrayna Rusiyaya layiqli şəkildə müqavimət göstərir, mübarizə aparır, azadlıq uğrunda işğalla barışmır, işğalı aradan qaldırmağa çalışır, lakin güclər qeyri-bərabərdir”.
Siyasi şərhçi Ukraynanın müharibədə önə keçə bilməməsinin səbəbini izah edib:
“Rusiyanın kifayət qədər hərbi baxımdan üstün olduğunu görürük. Onlar çox aqressiv müharibə aparır. Ukraynanın bu müharibəsini dayandırması və torpaqlarını bütövlükdə işğaldan azad etməsi real görünmür. ABŞ-nin Ukraynaya kömək göstərməsi, Avropanın tam dəstəkləməsi belə bu situasiyanı dəyişə bilmir. Nə qədər kömək edilsə də, Ukrayna əsgəri Rusiya əsgəri ilə qarşı-qarşıya gəlir və məsələ oradaca həll edilir. Ukrayna əsgərinin Rusiyaya qarşı müqaviməti lazımlı şəkildə təşkil etmək imkanı yoxdur”.
Mikayıl Mirzəzadə
