“Özünüməşğulluq proqramına cəlb olunan şəxslərin ünvanlı dövlət sosial yardımı alması müəyyən hallarda real görünə bilər, lakin bu, konkret ailənin gəlir vəziyyətindən asılıdır. Hər iki mexanizm sosial cəhətdən həssas təbəqənin müdafiəsinə xidmət edir, amma mahiyyət etibarilə fərqli məqsədlər daşıyır”.
Bu fikirləri Liberal İqtisadçılar Mərkəzinin sədri Akif Nəsirli KONKRET.az-a açıqlamasında səsləndirib:
“Özünüməşğulluq proqramı Əmək və Əhalinin Sosial Müdafiəsi Nazirliyi tərəfindən icra olunur və əsas məqsədi işsiz və aztəminatlı şəxslərə kiçik təsərrüfat və ya xidmət fəaliyyəti qurmaq üçün aktivlərlə dəstək verməklə onların davamlı gəlir əldə etməsini təmin etməkdir. Ünvanlı dövlət sosial yardımı isə gəliri yaşayış minimumundan aşağı olan ailələrin istehlak səbətini formalaşdırmaq üçün müvəqqəti maliyyə dəstəyidir”.
A.Nəsirli qeyd edir ki, əgər özünüməşğulluq çərçivəsində yaradılan fəaliyyət hələ sabit və kifayət qədər gəlir gətirmirsə və ailənin adambaşına düşən gəliri müəyyən olunmuş meyardan aşağı qalırsa, həmin ailənin sosial yardım almaq hüququ nəzəri baxımdan mümkündür.
“Lakin proqramın fəlsəfəsi ondan ibarətdir ki, şəxs zamanla sosial yardıma ehtiyacdan çıxaraq öz gəliri hesabına dolana bilsin. Buna görə də uzunmüddətli perspektivdə hər iki proqramdan paralel və davamlı istifadə məqsədəuyğun hesab edilmir və qiymətləndirmə zamanı gəlir göstəriciləri əsas meyar kimi götürülür”.
