“Azərbaycanda media subyektləri üçün vergi güzəştinin müddəti daha 3 il uzadılır. Bununla bağlı məsələ “Azərbaycan Respublikasının 2026-cı il dövlət büdcəsi haqqında” qanun layihəsində öz əksini tapıb. Çünki media subyektləri üçün 3 illik vergi güzəştinin müddəti 2026-cı il yanvarın 1-də başa çatırdı”.
“Demokrat.az” xəbər portalının rəhbəri, “Ekoloji Dayanıqlılıq və Təbiətin Qorunması” İctimai Birliyinin sədri Vasif Həsənli Bizim.Media-ya açıqlamasında bu fikirləri səsləndirib.
O, güzəştin müddətinin uzadılmasının önəmindən söz açıb.
“Şübhəsiz ki, bu qərar Azərbaycan mediası tərəfindən təqdir olunur. Azərbaycanda media subyektlərinə tətbiq olunan bu cür vergi güzəştləri dövlətin media sektorunun inkişafına və dayanıqlılığına verdiyi strateji əhəmiyyətin bariz göstəricisidir. Bu güzəştlər yalnız iqtisadi dəstək kimi deyil, həm də medianın cəmiyyətin maariflənməsi, ictimai rəyin formalaşdırılması və informasiya təhlükəsizliyinin təmin olunmasındakı roluna verilən dəyərin təzahürü kimi qiymətləndirilir”, – deyə Vasif Həsənli qeyd edib.
O bildirib ki, Dövlətin bu istiqamətdə atdığı addımlar media orqanlarının maliyyə yükünü azaldır, onların daha sərbəst fəaliyyət göstərməsinə, peşəkarlıq səviyyəsini artırmasına və keyfiyyətli informasiya məhsulları istehsal etməsinə şərait yaradır:
“Bununla yanaşı, bu cür güzəştlər media sektorunda şəffaflığın və rəqabət qabiliyyətinin yüksəlməsinə də müsbət təsir göstərir.
Hesab edirəm ki, vergi güzəştləri həm də dövlət–media münasibətlərində etimadın güclənməsi, media mühitinin sağlam və davamlı inkişafının təmin olunması baxımından da mühüm mexanizm olacaq”.
