Ukraynanın Prezidenti Volodimir Zelenski və onun administrasiyası dövlət şirkətlərinə kənar nəzarət sistemini zəiflədib, korrupsiyanın artmasına səbəb olub.
Medialive xəbər verir ki, bu barədə The New York Times (NYT) məlumat yayıb.
Nəşr qeyd edib ki, Kiyevin qərbli müttəfiqləri əvvəllər nəzarət şuraları adlanan kənar ekspert qruplarına xərclərə nəzarət etmək, icraçıları təyin etmək və korrupsiyanın qarşısını almaq üçün icazə verilməsini tələb ediblər.
Məlumata görə, son illərdə Ukrayna hökuməti sistemli şəkildə bu sistemi pozub.
Zelenski administrasiyasına sadiq insanlar nəzarət şuralarına təyin edilib, bəzi yerlər boş qalıb, müstəqil nəzarətin səlahiyyətlərini məhdudlaşdırmaq üçün şirkət nizamnamələri yenidən yazılıb.
Qeyd edilib ki, bu, Ukraynaya idarəetmə üzərində nəzarəti saxlamağa və kənar müşahidəçilərin mənalı müdaxiləsi olmadan yüz milyonlarla dollar xərcləməyə imkan verib.
Qəzet əlavə edib ki, müşahidə şuraları siyasi müdaxilə hallarının sənədləşdirildiyi Energoatom və Ukrenergo kimi dövlət şirkətlərinə, eləcə də Müdafiə Təchizatları Agentliyinə nəzarətdə əsas rol oynayır. Korrupsiyaya qarşı mübarizə orqanları Zelenskinin ətrafının üzvlərini Energoatom-dan təqribən 100 milyon dollar oğurlamaqda və yumaqda günahlandırır, Zelenski administrasiyası isə korrupsiyada şirkətin müşahidə şurasını günahlandırır.
