“DTX AXCP sədri Əli Kərimlinin mənzilində axtarış işləri həyata keçirib. Bu addım Ramiz Mehdiyev işi ilə birbaşa əlaqəli reallaşdırılıb. Axtarış prosesində tapılmış sənədlər və materiallar bütün yolların Moskvaya apardığını təsdiqləyib. Xüsusilə də Əli Kərimlinin milyarderlər ittifaqı ilə əlaqələrini təsdiqləyən sənədlər ortaya çıxıb. Eyni zamanda Ramiz Mehdiyevin Moskvaya ünvanladığı məktubların, mediada getməyən, redaktə olunmuş variantı da üzə çıxıb. Deməli, Əli Kərimli bir yandan özünü Qərb siyasətçisi kimi cəmiyyətə sırımaq istəyib, digər tərəfdən isə Moskva ilə əlaqədə olduğu təsdiqlənib”.
Bu fikirləri Medialive.az-a açıqlamasında Milli Məclisin deputatı Elman Nəsirov deyib.
O bildirib ki, Əli Kərimli Rusiya Federal Təhlükəsizlik Xidməti ilə əlaqədə olub:
“Əli Kərimlinin yaxın silahdaşlarından biri olan Saleh Rüstəmlinin Rusiya xüsusi xidmət orqanlarının ismarıclarını Əli Kərimliyə çatdırdığı ilə bağlı faktlar da təsdiqini tapıb. Bu faktlar göstərir ki, Əli Kərimli konspirativ qaydada da olsa, Rusiyanın Federal Təhlükəsizlik Xidməti ilə bu və digər səviyyədə əlaqədə olub. Bu, artıq Əli Kərimliyə qarşı Azərbaycan Respublikası Cinayət Məcəlləsinin 278.1 (hakimiyyəti zorla ələ keçirmək və dövlətin konstitusiya quruluşunu devirmək) maddəsi ilə ağır ittiham irəli sürülüb. Belə olan təqdirdə istinsa deyil ki, istintaq prosesinə cəlb edilən şəxslərin siyahısı daha da genişlənsin. Artıq Milli Şuranın Koordinasiya Mərkəzinin üzvü Gültəkin Hacıbəyli İstanbuldan deportasiya edilib. Onun da istintaqa cəlb ediləcəyi labüddür. O da bəllidir ki, Milli Şuranın sədri Cəmil Həsənli Dubaya qaçmaq istəyərkən hava limanında saxlanılıb və ölkədən çıxışına stop qoyulub. “DTX onu da istintaqa cəlb edib”.
Deputat qeyd edib ki, AXCP illərdir antidövlət fəaliyyətinin ideoloji mərkəzi olub:
“Bu sıranın genişlənəcəyi gözləniləndir. Ən əsası odur ki, cəmiyyəti belə bir sual maraqlandırır. Bir partiyanın sədri dövlət hakimiyyətini zəbt etmək işində ittiham olunursa, deməli onun rəhbərlik etdiyi partiyanın bu gün Azərbaycan siyasi sistemində mövcudluğuna yer yoxdur. Bu partiya antidövlət fəaliyyətinin ideoloji mərkəzi olub. Xaricdən təlimatlar alıb. Sözügedən nöqteyi-nəzərdən partiyanın fəaliyyətinə xitam verilməsi məsələsi də bir ictimai sifarişə çevrilməkdədir. Yəqin ki, bu məsələlərə yaxın günlərdə aydınlıq gətiriləcək”.
Mikayıl Mirzəzadə
