Azərbaycan Qida Təhlükəsizliyi Agentliyinin (AQTA) tabeliyindəki Azərbaycan Qida Təhlükəsizliyi İnstitutunun (AQTİ) strukturu genişləndirilib.
Medialive.az xəbər verir ki, bununla bağlı müvafiq qərar qəbul olunub.
Belə ki, yeni yaradılan Vaksin istehsalı sektoru İnstitutun strukturuna daxil edilib. Hələlik sektora müdir təyinatı olmayıb. Sektorun adına nəzər yetirdikdə AQTİ-də vaksin istehsalının həyata keçiriləcəyi görünür.
Qurumdan İqtisadiyyat.az-ın sorğusuna cavab olaraq bildirilib ki, AQTA ilə Belarus Respublikasının müvafiq qurumları arasında qida təhlükəsizliyi, bitki və heyvan sağlamlığı sahələrində əməkdaşlıq həyata keçirilir.
Qeyd olunub ki, Belarus Respublikasının “BelVitunifarm” ASC-nin baş direktoru Darovskix İlya Anatolyeviçin rəhbərlik etdiyi nümayəndə heyətinin Azərbaycan Qida Təhlükəsizliyi İnstitutuna səfəri çərçivəsində iki qurum arasında quduzluğa qarşı vaksin tərkibli hazır aldadıcı yemlərin istehsalı müəssisəsinin yaradılması ilə bağlı əməkdaşlıq və məxfilik müqaviləsi imzalanması əsasında da AQTİ-də Vaksin istehsalı sektoru yaradılıb.
“Hazırda Belarus Respublikasının “BelVitunifarm” ASC ilə əldə edilən razılıq əsasında müvafiq işlər həyata keçirilir”, – məlumatda bildirilib.
