İranın nüvə proqramı üzrə Aİ-3 ölkələri ilə danışıqları bərpa etmək istəyi Tehran üçün böyük səhv olardı, çünki onlar İranla münaqişələrdə həmişə İsraili dəstəkləyiblər.
Medialive xəbər verir ki, bu fikirləri TASS-a müsahibəsində iranlı politoloq Rouhollah Modabber deyib.
“Bu gün avropalıların danışıqlara hazır olduqlarını nəzərə alaraq, onlarla danışıqlara yeni cəhd Tehranın növbəti məğlubiyyətindən başqa heç nəyə gətirib çıxarmayacaq. İndiki şəraitdə İran yeni təhdidlərə qarşı daha çox immunitet qazanmaq istəyirsə, Rusiya ilə münasibətlərini dərinləşdirməli və əməkdaşlığı inkişaf etdirməlidir”, – o qeyd edib.
Modabberin fikrincə, Tehran Vaşinqtonla danışıqlarda Moskvanın vasitəçiliyindən həmişə faydalanacaq.
“Mən dəfələrlə demişəm ki, Tehran Avropaya təzyiq göstərmək və siyasi xal qazanmaq istəyirsə, şübhəsiz ki, Rusiyadan kömək istəməlidir”, – ekspert əlavə edib.
Qeyd edək ki, noyabrın 26-da İranın xarici işlər naziri Abbas Əraqçi fransalı həmkarı Jan Noel Barronun dəvəti ilə Parisə səfər edib.
