ABŞ Prezidenti Donald Tramp dekabrın 25-dək Qəzza sülh planının ikinci mərhələsinin başlandığını elan etməyi planlaşdırır.
Medialive xəbər verir ki, bu barədə Axios məlumat yayıb.
Məlumata görə, Amerika lideri Milad bayramından əvvəl Qəzza sülh prosesinin ikinci mərhələsinə daxil olduğunu elan etmək və anklavı idarə edəcək yeni struktur təqdim etmək niyyətindədir.
Trampın bu addımları müzakirə etmək üçün dekabrın sonunadək İsrailin baş naziri Benyamin Netanyahu ilə görüşəcəyi gözlənilir.
Qeyd edilib ki, planın ikinci mərhələsi İsrail qoşunlarının Qəzza zolağından çıxarılmasını, orada beynəlxalq sabitləşdirmə qüvvələrinin yerləşdirilməsini və anklavı idarə edən strukturların, o cümlədən “Sülh Şurası”nın işə başlamasını nəzərdə tutur.
Axios yazıb ki, planın birinci mərhələsinin əsas elementi HƏMAS hərəkatı tərəfindən qaçırılan bütün şəxslərin azad edilməsi və ölən girovların qalıqlarının geri qaytarılması, demək olar ki, başa çatıb.
Qeyd edək ki, oktyabrın 9-da İsrail və HƏMAS Misir, Qətər, ABŞ və Türkiyənin vasitəçiliyi ilə Trampın təqdim etdiyi sülh planının birinci mərhələsini həyata keçirmək barədə razılığa gəliblər. Qəzzada atəşkəs oktyabrın 10-da qüvvəyə minib.
