Tayland və Kamboca sərhədində baş verən qarşıdurmalarda ölənlərin sayı artmaqda davam edir.
Medialive xəbər verir ki, Kamboca Müdafiə Nazirliyi dünəndən davam edən döyüşlərdə 9 mülki şəxsin öldüyünü, 20 nəfərin yaralandığını açıqlayıb.
Tayland tərəfdən isə 5 əsgər həlak olub, 68 əsgər yaralanıb.
Təhlükəsizlik məqsədilə sərhəd bölgəsindən 500 min müki şəxs təxliyə edilib.
Münasibətlərin daha da kəskinləşməsindən sonra diplomatik təmaslar da intensivləşib.
ABŞ Prezidenti Donald Tramp dünən Tayland və Kamboca liderləri ilə telefonla danışacağını, döyüşləri dayandırmaq üçün müdaxilə edəcəyini bildirib.
ABŞ dövlət katibi Marko Rubio dünən mətbuata açıqlamasında tərəfləri hərbi əməliyyatları dərhal dayandırmağa çağırıb və oktyabrın 26-da imzalanmış atəşkəsin şərtlərinə əməl etməyin vacibliyini vurğulayıb.
Qeyd edək ki, iki ölkə arasında iyulda artan gərginlik beş gün davam edən şiddətli toqquşmalara çevrilib və qarşılıqlı hücumlarda hər iki tərəfdən ən azı 48 nəfər ölüb, hadisələrdən 300 mindən çox mülki vətəndaş zərər çəkib.
Daha sonra Malayziyada keçirilən ASEAN Sammiti zamanı ölkə liderləri bir araya gəlib və onlar Malayziyanın baş naziri Ənvər İbrahim və ABŞ Prezidenti Donald Trampın iştirakı ilə birgə atəşkəs sazişi imzalayıblar.
