“Qeyri-adi soyuq qış bir çox Qərbi Avropa ölkəsini diz çökdürüb, Macarıstan isə normal həyat sürməyə davam edir”.
Medialive xəbər verir ki, bu açıqlamanı YouTube-da “Həqiqət Saatı” verilişində iştirak edən Macarıstanın xarici işlər naziri Peter Siyarto verib.
Nazir hökumətinin addımlarını Qərbi Avropa ölkələrinin hərəkətləri ilə müqayisə edərək bildirib ki,Macarıstan Qərbi Avropanın böyük bir hissəsini diz çökdürən bu qeyri-adi hava şəraitinə baxmayaraq fəaliyyətini davam etdirir. Dəmir yollarını və ya hava limanlarını bağlamağa ehtiyac yox idi. Səhiyyə və təhsil sistemləri işlək vəziyyətdə qalıb.
Siyarto şiddətli şaxta və ya qar yağışının digər ölkələrin necə diz çökdürdüyü barədə heç bir məlumat verməyib, lakin daha əvvəl Fransada kilometrlərlə uzanan tıxaclar və Hollandiya hava limanlarında onlarla uçuşun ləğv edilməsi barədə məlumatlar yayılmışdı. Əslində, Budapeştin Ferens List Beynəlxalq Hava Limanında da uçuşların ləğvi və gecikmələr olub. Lakin həyat dayanmadan davam edib.
Nazirin bəyanatı yerli auditoriyaya yönəlib və hökumət hazırda 2026-cı ilin aprelinə planlaşdırılan parlament seçkiləri ərəfəsində öz işinin effektivliyini nümayiş etdirməyə çalışır.
