NATO-nun baş katibi Mark Rutte Xorvatiyaya səfər edib.
Medialive xəbər verir ki, Rutte səfəri çərçivəsində Xorvatiyanın Baş naziri Andrey Plenkoviç ilə birgə mətbuat konfransında çıxış edib.
Rutte İngiltərə, Almaniya və ABŞ başda olmaqla bəzi Avropa ölkələrinin Arktika bölgəsinin təhlükəsizliyini təmin etmək üçün addımlar atmaq niyyəti barədə suala belə cavab verib:
“Bütün müttəfiqlər Arktika bölgəsinin təhlükəsizliyinin vacibliyi ilə razıdırlar. Çünki bilirik ki, dəniz yollarının açılması ilə rusların və çinlilərin bölgədə daha aktiv olma riski var”.
Rutte NATO-nun yeddi üzvünün Arktika bölgəsində yerləşdiyini qeyd edib. O, həmçinin Çinin regiondakı fəaliyyətini artırdığını da bildirib.
Rutte Qrenlandiyanın NATO-nun əsas hissəsi olduğunu vurğulayıb və bu məsələ ilə bağlı ittifaq daxilində çox məhsuldar müzakirələr apardıqlarını açıqlayıb.
Rutte ABŞ Prezident Donald Trampın Qrenlandiyanı işğal etməsi ilə bağlı sualları cavablandırmaqdan yayınıb.
