Martın 9-da 11-ci siniflərin buraxılış imtahanı keçirilib.
İmtahanda iştirak etmiş abituriyentlər sualların çətinliyindən, anlaşılmazlığından, eyni zamanda texniki problemlərin olduğundan şikayətlənirlər.
Sosial şəbəkələrdə yayılan paylaşımlarda isə bəzi istifadəçilər imtahan sistemində dəyişikliklərin aparılmasını mühüm hesab edir, digərləri isə Dövlət İmtahan Mərkəzinin fəaliyyətinin yenidən qiymətləndirilməli olduğunu qeyd edirlər.
Hətta abituriyentlərin əksəriyyəti DİM sədri Məleykə Abbaszadənin istefasını tələb edən paylaşımlar edirlər.
Burada cəmiyyəti düşündürən əsas nüans isə suallar deyil, imtahanın doğru zamanda keçirilməməsidir.
Hamımıza tanışdır ki, orta məktəblər iyun ayının 15-də bitir və ötən illər ərzində abituriyentlər imtahanları məhz yay aylarında verirdilər.
Hazırda isə kuryoz hallardan ən böyüyü imtahanın mart ayında keçirilməsidir. Son 7-8 ildir ki, buraxılış imtahanları mart ayında təşkil edilir.
İllərdir bütün abituriyentləri, müəllimləri və valideynləri fikirləşməyə vadar edən, səbəbi açıqlanmayan məlum sual budur: “Məktəblər iyunda bitir, harda görülüb ki, buraxılış imtahanı martda keçirilirsin?
Bu sual ətrafında son 5 ildə nə məntiqli, nə də lazımi cavab verilib. Mətbuatın hər dəfə göndərdiyi bu suala isə DİM öz aləmində şablon cavab verir. Bu qeyri-müəyyən cavabın isə nə məktəbliyə, nə də onun valideyninə xeyri var.
Ötən gün siyasi şərhçi Azər Niftiyev möhtəşəm bir təhlil yazısı yazmışdı.
Yazısında bir nüansa toxunmuşdu: “Milli Məclisin Elm və Təhsil Komitəsinin sabiq sədri Şahlar Əsgərov dəfələrlə həyəcan təbili çalırdı ki, universitetlər qəbul qapısını açıq, çıxış qapısını bağlı saxlamalı, gənclərə “yaşıl işıq” yandırmalı, amma mütəxəssis olmadan universiteti bitirməsini çətinləşdirməlidir. Dünya təcrübəsində bu metoddan geniş istifadə edilir və kifayət qədər uğurlu nəticələri var”.
DİM isə tam fərqli və mənasız siyasət yürüdür. İllərlə dişi ilə, dırnağı ilə övladının təhsilinə külli miqdarda pul xərcləyən valideynin zəhmətini bilərəkdən puça çıxarır. Abituriyentləri sıxır, onları stimullaşdırmaq əvəzinə, təhsildən soyudur, eyni zamanda onları daim təşviş altında saxlamaq üçün gecə-gündüz “nə edim, necə edim” deyə düşünür.
Digər bir məsələ isə son dövrlər cəmiyyətdə ciddi rezonas doğurudur. Abituriyenti orta məktəbdə imtahana hazırlayırlar? Yoxsa repetitor yanına göndərərək? Son dövrlər DİM məhz repetitor bazarını məhv etməkdən ötrü canla-başla çalışır. Bəs, düşünmür ki, abituriyentlərə təhsili sevdirən məktəb müəllimi deyil, sonradan tanıdığı repetitor müəllimidir?
Bu gün abituriyentin bilərəkdən məktəbdən “yoxlama gələcək” adı altında hazırlığa getməsinə əngəl törədən məktəb rəhbərliyi həmin abituriyentə gələcəkdə çörək verirmi? Çox güman ki, bu da DİM-in və Elm və Təhsil Nazirliyinin birgə uğursuz siyasətinin nəticəsidir. Universitetlər mütəxəssis yetişdirməlidir, yalandan diplom paylamamalıdır. Bu gün Azərbaycan gəncinin qəsdinə duran, onun haqqına girən DİM və onun yarıtmaz sistemi dəyişməzsə, gənc nəsil bütövlüklə uçuruma sürüklənəcək.
Medialive.az informasiya portalının rəhbəri, jurnalist Mikayıl Mirzəzadə
