Kənd Təsərrüfatı Nazirliyi yanında Aqrar Xidmətlər Agentliyi heyvanlar arasında yayılmış dabaq xəstəliyi ilə mübarizəyə milyonlarla manat vəsait xərcləyəcək.
Manset.az-ın əldə etdiyi məlumata görə, bununla bağlı elan edilmiş satınalma müsabiqələri yekunlaşıb.
Məlumata görə, Agentliyin tabeliyində olan Heyvan Sağlamlığı və Baytarlıq Xidmətləri Mərkəzi üçün Dabaq (A.O. SAT 2, A.O. Asiya 1, Sat 2) xəstəliyinə qarşı peyvənd vasitələrinin alınmasına başlanılıb.
Alqı-satqı ilə bağlı “Epidbiomed” şirkəti ilə razılıq əldə olunub və qurum üçün 5 200 000 doza A.O. SAT 2 və 5 100 000 doza isə A.O. Asiya 1, Sat 2 vaksini sifariş edilib.
Bu şirkət ümumilikdə 10 300 000 doza dabaq peyvəndinin idxalına və agentliyə satışına görə 7 272 700 manat ödəniş təklif edib.
Yaxın günlərdə alqı-satqı ilə bağlı şirkətlə rəsmi müqavilə bağlanacağı gözlənilir.
