Finlandiya noyabr-dekabr ayları arasında Rusiya ilə həmsərhəd bölgələr də daxil olmaqla, təxminən 15 min hərbçinin cəlb olunduğu irimiqyaslı hərbi təlimlər keçirəcək.
Medialive xəbər verir ki, bu barədə Finlandiya Quru Qoşunları açıqlama yayıb.
Məlumata görə, təlimlərin məqsədi çağırışçıların, ehtiyatda olan hərbçilərin və ordunun şəxsi heyətinin müharibə vaxtı vəzifələrə birgə hazırlığını təmin etməkdir. Təlimlərdə müttəfiq dövlətlərin qoşunları da iştirak edəcək.
Bu təlimlər NATO-nun Finlandiyada hərbi infrastrukturunu gücləndirməsi fonunda keçirilir. Sentyabrın 1-də NATO-nun quru qoşunlarının Regional Komandanlığı qərargahı Rusiya sərhədindən 140 kilometr aralıda yerləşən Mikkelidə əməliyyatlara başlayıb. İlkin mərhələdə onun heyəti təxminən on zabit olacaq, sonradan onların sayı 50-yə yüksələcək. NATO Komandanlığının Norfolk (ABŞ) rəhbərlik etdiyi yeni struktur alyansın şimal bölgəsində quru qoşunlarının idarə edilməsinə, milli orduların hərəkətlərinin əlaqələndirilməsinə, təlimlərin və əməliyyatların birgə planlaşdırılmasına cavabdehdir.
