“Budapeştdə keçiriləcək Rusiya-Amerika sammitinə hazırlıq davam edir və Macarıstan görüşün uğurlu olması üçün üçün lazım olan hər şeyi etməyə hazırdır”.
Medialive xəbər verir ki, bu barədə Macarıstanın Baş naziri Viktor Orban Radio Kossuth-un səhər proqramında çıxışı zamanı bildirib.
Macarıstanın Ukraynadakı münaqişənin həlli səylərinə necə kömək etməsi ilə bağlı suala o belə cavab verib:
“Mən təfərrüatlara varmaq istəmirəm. Çünki Budapeştdə mühüm sülh sammitinə hazırlıq gedir”.
Hökumət başçısı hesab edir ki, Macarıstan sülhə dəyərli töhfə verir, çünki bu, Avropa İttifaqında Rusiya ilə kommunikasiya kanallarını açıq saxlayan və daimi əlaqədə olan yeganə ölkədir.
“Biz onlarla danışıqlar aparırıq və mən bütün Avropada lazım gələrsə, Rusiya prezidenti ilə danışa bilən yeganə baş nazirəm”, – deyə Orban qeyd edib.
Orban qeyd edib ki, o, Ukrayna münaqişəsinin həlli üçün hələ də ümidlərini Trampa bağlayır.
“Söhbət müharibəni mənasız hesab edən və onun bitməsini istəyən bir adamdan gedir. ABŞ prezidentinin ədalətli vəziyyət yaratmaq üçün səy göstərməsi üçün hər cür əsas var və o, ruslara təzyiq göstərmək istəsə də, Macarıstana zərər vermək istəmir”, – deyə baş nazir Trampın Macarıstanı Rusiya neft və qazına qarşı sanksiyalardan azad etməyə niyə razı olduğunu izah edib.
