Hindistanın “Indian Oil Corporation”, “Bharat Petroleum” və “Hindustan Petroleum” neft-qaz şirkətləri ABŞ ilə 2 milyon tondan çox mayeləşdirilmiş təbii qaz almaq üçün bir illik müqavilə imzalayıblar.
Medialive xəbər verir ki, bunu Hindistanın neft və təbii qaz naziri Hardeep Singh Puri bildirib.
O qeyd edib ki, bu, Amerika LNG-nin Hindistan bazarına tədarükü üzrə ilk müqavilədir və bunu tarixi adlandırıb.
Hindistanlı nazir vurğulayıb ki, Yeni Dehli Hindistan xalqını etibarlı və sərfəli mayeləşdirilmiş təbii qaz təchizatı ilə təmin etməyə sadiqdir və onun mənbələrini şaxələndirir.
Purinin sözlərinə görə, sövdələşmədən əvvəl bir neçə aylıq danışıqlar aparılıb. Hindistanın neft şirkətlərindən ibarət nümayəndə heyəti ABŞ-da olub və Amerikanın aparıcı istehsalçıları ilə məsləhətləşmələr aparıb.
