ABŞ prezidentinin müşaviri Tom Barak Livana sərt ultimatum verərək, Hizbullahın dərhal tərksilah edilməsini tələb edib.
Medialive xarici mediaya istinadən xəbər verir ki, Barak xəbərdarlıq edib ki, rəsmi Beyrut silahlar üzərində dövlət inhisarını bərpa etməsə, İsrail birtərəfli hərəkət edə bilər və bunun ciddi nəticələri olacaq.
Barak xəbərdarlıq edib ki, Livan hökuməti Hizbullahı tərksilah etmək üçün səyləri artırmasa, İsrail Livanın paytaxtı Beyruta yenidən zərbələr endirə bilər.
Barakın xəbərdarlığı İsrailin Livan sərhədində beş günlük hərbi təlimlərinin başlamasına təsadüf edib.
İsrail Müdafiə Nazirliyi açıqlamasında bildirib ki, təlimlər qoşunları müxtəlif ssenarilərə hazırlamaq məqsədi daşıyır.
Hizbullah tam tərksilah olma ehtimalını rədd edir. Hizbullah sözçüsü Həsən Fədlallah İsraili dəstəkləməyə davam edənləri ittiham edərək sərt tənqid edib.
Qeyd edək ki, Livan və İsrail arasında atəşkəs sazişi 2024-cü il noyabrın 27-də imzalanıb.
Atəşkəsin şərtlərinə görə, İsrail 60 gün ərzində qoşunlarını Livan ərazisindən çıxarmalı, Hizbullah isə silahlarını təhvil verməli idi.
Elxan Nəsirov
