Əhalinin tibbi xidmətlərə əlçatanlığının təmin edilməsi, tibb müəssisələrində göstərilən ixtisaslaşdırılmış tibbi xidmətlərin sayının artırılması və təkmilləşdirilmə işlərinin aparılması istiqamətində tədbirlər davam edir.
Oftalmoloji sahənin inkişafı istiqamətində həyata keçirilən növbəti yeniliklərdən biri Abşeron Rayon Mərkəzi Xəstəxanası ilə bağlıdır. Tibb müəssisəsində göz əməliyyatlarının icrasına başlanılıb.
“Xarici çəpgözlük” (exotropiya) diaqnozu təyin edilənpasiyent üzərində həyata keçirilən ilk cərrahi əməliyyatuğurla başa çatıb. Prosedur zamanı gözün daxili düz əzələsi qısaldılıb, xarici düz əzələsi isə uzadılıb. Bu üsul vasitəsilə göz bəbəklərinin paralel vəziyyətə gətirilməsi, baxış istiqamətinin normallaşdırılması və estetik görünüşün bərpası təmin olunub.
Hazırda pasiyentin müvafiq şöbədə müalicəsi davam etdirilir, vəziyyəti stabildir.
Qeyd edək ki, bu, Abşeron Rayon Mərkəzi Xəstəxanasında göz cərrahiyyəsi sahəsində yenilikdir və gələcəkdə bu istiqamətdə daha çox cərrahi prosedurların həyata keçirilməsi planlaşdırılır.
Tibb müəssisəsində göz müayinələri və əməliyyatlar İcbari Tibbi Sığorta üzrə Dövlət Agentliyinin Xidmətlər Zərfi çərçivəsində həyata keçirilir.
