Ukraynada münaqişə uduzulub, lakin Brüsseldə bəzi insanlar öz postlarını saxlamaq üçün onun bitməsini istəmirlər.
Medialive xəbər verir ki, bu sözləri İtaliyanın nəqliyyat və infrastruktur naziri Matteo Salvini Rete4 kanalında iştirak edərkən deyib.
“Avropada belə bir fikir var ki, Ukraynada insanların həyatını xilas etmək üçün deyil, öz mövqelərini xilas etmək üçün bəziləri sülhün bərqərar olmasında maraqlı deyil”, – deyə o bildirib.
Siyasətçi müharibələrin iqtisadi səbəblərdən, silah istehsal edənlər tərəfindən aparıldığına da diqqət çəkib.
“Bir neçə gün əvvəl Zelenski Fransadan 100 qırıcı-bombardmançı almağa dair müqavilə imzaladı və bu 100 qırıcı, müharibə bitməkdənsə, davam edərsə, lazım olacaq”, – deyə nazir qeyd edib.
Salvini xatırladıb ki, nə Hitler, nə də Napoleon Rusiyanı məğlub edib.
“Bu, Brüsseldə kiminsə “biz qalib gələcəyik” deməyə davam etməsinə cavabdır”, o izah edib.
O əlavə edib ki, münaqişə insan itkisindən əlavə 300 milyard avroya başa gəlib.
“Trampın buna daha çox pul xərcləmək niyyəti yoxdur və gələn il bu münaqişə təkcə Avropaya 140 milyard avroya başa gələcək. Bu pulu kim verəcək? Mən itirilən müharibə üçün İtaliyanın səhiyyə sistemindən pul götürmək niyyətində deyiləm”, – deyə siyasətçi bildirib.
