“Saxta informasiya ilə mübarizə həm fərdi səviyyədə, həm dövlət və cəmiyyət səviyyəsində aparılmalıdır. İlk olaraq mənbənin etibarlığı yoxlanılmalı, xəbərin kimlər tərəfindən yayıldığını öyrənmək mühümdür. Emosional başlıqlar, mənbə göstərilməməsi, sübutların olmaması, qərəzli ton və s. bunlar saxta informasiya yayanlar üçün elə də əhəmiyyət kəsb etmir”.
Bu fikirləri Medialive.az-a açıqlamasında “Vətəninfo.az” İnformasiya Agentliyinin baş redaktoru Nahid Canbaxışlı Prezident İlham Əliyevin D-8 Media Forumunun iştirakçılarına müraciət etməsini şərh edərkən deyib.
Agentlik rəhbəri qeyd edib ki, Qafqaz regionu Rusiya, Türkiyə, İran və Qərb arasında geosiyasi kəsişmə nöqtəsidir:
“Beynəlxalq medianın Azərbaycana qarşı qərəzinə gəlincə, bu, çoxmərtəbəli və müxtəlif perspektivləri olan bir məsələdir. Beynəlxalq media tez-tez böyük güclərin maraqlarını, regiondakı siyasi balansı və enerji geosiyasətini nəzərə alır. Qafqaz regionu isə Rusiya, Türkiyə, İran və Qərb arasında geosiyasi kəsişmə nöqtəsidir. Bu da təqdimat tərzinin müxtəlif olmasına yol aça bilir. Eyni zamanda müxtəlif beynəlxalq fondlar, xüsusi xidmət orqanlarının nəzarətində olan bir çox beynəlxalq media quruluşları belə kampaniyalarda özlərini daha çox biruzə verirlər”.
Media kapitanı əlavə edib ki, 44 günlük Vətən Müharibəsi zamanı Prezident İlham Əliyevin beynəlxalq mediada çıxışları milyonlarla tamaşaçı və oxucuya çatdı:
“Mən hesab edirəm ki, beynəlxalq media ilə əməkdaşlıq mühüm rol oynamalıdır. 2020-ci ildə 44 günlük Vətən Müharibəsi zamanı Azərbaycan Prezidenti İlham Əliyevin beynəlxalq mediada çıxışları milyonlarla tamaşaçı və oxucuya çatdı. Bu erməni lobbisinin 30 il ərzində ölkəmizə qarşı beynəlxalq medianın ələ alınması ilə formalaşan mühasirənin dağıdılması idi. Azərbaycan diplomatiyası hansı uğurlara nail olursa, Azərbaycanın media orqanları, QHT-ləri də bu prosesin bir parçası olmaq məcburiyyətindədir”.
Mikayıl Mirzəzadə
