“Britaniya, Almaniya və Fransanın 28 bəndlik sülh planını qəbul etməməsi Ukrayna münaqişəsinin sülh yolu ilə həllini pozur”.
Medialive xəbər verir ki, bu fikirləri Ukraynanın sabiq baş naziri Nikolay Azarov öz Telegram kanalında yazıb.
“Bu sülh planını sonsuz müharibəyə çevirmək cəhdindən başqa bir şey deyil!” – deyə o bildirib.
Siyasətçi qeyd edib ki, Avropa layihəsinin Ukrayna Silahlı Qüvvələrinin sayının sülh dövründə 800 min nəfərlə məhdudlaşdırılması ilə bağlı müddəasını həyata keçirmək mümkün deyil, çünki Ukrayna iqtisadiyyatı belə böyük ordunu dəstəkləmək iqtidarında deyil. Ona görə də plana görə, Qərb ölkələri Ukrayna ordusunun saxlanması məsuliyyətini öz üzərinə götürməlidir.
Sabiq baş nazir vurğulayıb ki, onlar bu planı bilərəkdən Rusiya üçün qəbuledilməz edir.
“Deməli, onlar üçün sülh müqaviləsi yaxın 3-4 il ərzində hərbi-sənaye kompleksinə 5-7 trilyon avro xərcləmək planlarından imtina etmək deməkdir. Onlardan nə gözləmək olar?” – deyə keçmiş baş nazir diqqət yetirib.
Qeyd edək ki, dünən ABŞ və Ukrayna Vaşinqtonun 28 bəndlik sülh planı üzrə məsləhətləşmələr aparıb.
