“Bakı şəhərində aparılan söküntü işləri ilə əlaqədar təxminən 1500-dən çox ailə ilə razılaşma əldə olunub”.
Bu sözləri Oxu.Az-a açıqlamasında Azərbaycan Qiymətləndiricilər Cəmiyyətinin sədri Vüqar Oruc deyib.
O bildirib ki, proses “Bakı şəhərinin 2040-cı ilədək inkişafına dair Baş planı”na uyğun olaraq həyata keçirilir:
“Bildiyiniz kimi, ötən il qəzalı vəziyyətdə olan 200-ə yaxın binanın sökülməsi ilə bağlı qərar verilib. Lakin bu proses bununla yekunlaşmayacaq.
İstismar müddəti başa çatmış bir çox binaların sökülməsinə start veriləcək. Bu, şəhərin tarixi və qədim simasının qorunması şərti ilə infrastrukturun yenilənməsi, müasir standartlara cavab verən tikinti işlərinin aparılması məqsədi daşıyır.
İlkin mərhələdə 4000-dən çox mənzilin sökülməsi planlaşdırılır. Təqribən 1500-dən çox ailə ilə razılaşma əldə olunub və onların əksəriyyəti həmin razılaşma əsasında mülkiyyət hüququndan imtina edərək müvafiq kompensasiya məbləği ilə təmin olunub. Bu proses paytaxtın təxminən 8 rayonunda həyata keçirilir”.
Sədr qeyd edib ki, adətən parkların salınacağı, abadlıq işlərinin aparılacağı, metro xətlərinin və digər infrastruktur layihələrinin həyata keçiriləcəyi ərazilərdə müvafiq dövlət qurumları ilə birbaşa razılaşma əldə olunur və dövlət büdcəsindən həmin şəxslərə kompensasiya ayrılır:
“Yeni binaların tikintisi üçün isə müvafiq inşaat şirkətləri və investorlar müəyyənləşdirilir. Həmin investorlar birbaşa sakinlərlə danışıqlar aparır və ya müvafiq dövlət qurumları tərəfindən müəyyən edilmiş kompensasiya məbləğini təklif edirlər. Bir çox hallarda dövlətin icra qurumları tərəfindən keçirilən tenderlərdə qalib gələn şirkətlər kompensasiya məbləğini müəyyənləşdirir və həmin qərara uyğun olaraq ödənişlər həyata keçirilir.
Bu proses bəzi hallarda Dövlət Şəhərsalma və Arxitektura Komitəsi tərəfindən, bəzi hallarda isə Nazirlər Kabinetinin müvafiq qərarı ilə yaradılmış komissiya tərəfindən icra olunur.
Xüsusilə Yasamal rayonu ərazisində həyata keçirilən söküntü işləri və kompensasiya ödənişləri müvafiq komissiya tərəfindən təşkil edilir.
Fikrimizcə, daha məqsədəuyğun olar ki, bütün hallarda kompensasiya məbləğini müstəqil qiymətləndirici şirkətlər müəyyən etsin. Çünki “Qiymətləndirmə fəaliyyəti haqqında” qanuna əsasən, ölkədə daşınmaz əmlakın dəyərini müstəqil qiymətləndirici müəyyən etməlidir.
Bu daha obyektiv yanaşmadır. Əgər kompensasiya məbləğini investor müəyyən edirsə, təbii ki, o, daha az məbləğ ödəməyə çalışa bilər. Dövlət müəyyən edirsə, bu zaman da büdcə və qənaət prinsipləri nəzərə alınır.
Lakin qiymətləndirici bu prosesdə müstəqil tərəf kimi çıxış edərsə və kompensasiya məbləğini obyektiv şəkildə müəyyənləşdirərsə, bu, daha ədalətli razılaşmaların əldə olunmasına səbəb ola bilər”.
Onun sözlərinə görə, proses növbəti illərdə də davam etdiriləcək:
“Hazırda proses bu şəkildə davam edir və yalnız 2026-cı illə məhdudlaşmayacaq, növbəti illərdə də davam etdiriləcək.
Bu proses ölkənin, xüsusilə də paytaxtın tikinti və inşaat baxımından yenilənməsini, müasir standartlara cavab verən binaların inşasını, istismar müddəti başa çatmış və qəzalı vəziyyətdə olan binaların vətəndaşların təhlükəsizliyi baxımından sökülməsini nəzərdə tutur. Eyni zamanda, paytaxtın simasının yenilənməsi və gözəlləşdirilməsi məqsədi daşıyır”.
